ကရင်​ပြည်နယ်၊ ဖာပွန်ခရိုင် ကေအန်ယူ မူတြော်ခရိုင်အတွင်း စစ်ကောင်စီ တပ်နဲ့‌ ကေအန်အယ်လ်အေတို့ သြဂုတ်လအတွင်း တိုက်ပွဲပေါင်း ၅၆ ကြိမ်ဖြစ်ပွားခဲ့ပြီး လက်ရှိမှာလည်း တပ်မဟာ ၂ နယ်မြေမှာ စစ်ကောင်စီက စစ်အင်အား တိုးချဲ့နေတာကြောင့် တိုက်ပွဲဖြစ်ပွားမှာကို ဒေသခံတွေ စိုးရိမ်နေကြပါတယ်။

သြဂုတ် ၁ ရက်နေ့မှ ၁၅ ရက်နေ့အထိ ကေအန်ယူ တပ်မဟာ ၅ ထိန်းချုပ်နယ်မြေအတွင်း စစ်ကောင်စီတပ်နဲ့နယ်ခြားစောင့်တပ် (BGF) တပ်ဖွဲ့တွေက စစ်အင်အားနဲ့ လက်နက်ခဲယမ်း ပိုမို​ဖြည့်တင်းတာ၊ နယ်မြေတိုးချဲ့ပြီး စစ်ရေးလှုပ်ရှားတာ၊ စခန်းတည်ဆောက်တာတွေကြောင့် နေစဥ်တိုက်ပွဲဖြစ်ပွားနေတာလို့ ကေအန်ယူသတင်းဌာနက သြဂုတ် ၁၈ ရက်မှာ သတင်းထုတ်ပြန်ပါတယ်။

တိုက်ပွဲအတွင်း စစ်ကောင်စီဘက်က သေဆုံးသူ  ၃၄ ဦး၊ တပ်ရင်းမှူး ၁ ဦး အပါအဝင် ၁၅ ဦး ဒဏ်ရာရရှိခဲ့သလို ကေအဲန်အယ်လ်အေ တပ်မဟာ ၅ ဖက်က ၃ ဦး ဒဏ်ရာရရှိခဲ့ပြီး ​ဒေသခံပြည်သူ ၁ ဦးသေဆုံးကာ ၁ ဦးဒဏ်ရာရခဲ့ပါတယ်။

စစ်ကောင်စီတပ်ဘက်က ပစ်ခတ်လိုက်တဲ့ လက်နက်ကြီး ၈၈ လုံး၊ လက်နက်ငယ် ၁၅၀၀ လုံးဟာ ​ဒေသခံတွေရဲ့ ကျေးရွာအတွင်းနဲ့ လယ်မြေ၊ ဥယျာဥ်ခြံတွေထဲ ကျရောက်ပေါက်ကွဲ ခဲ့ပါတယ်။

ကေအန်ယူ မူတြော်ခရိုင် တပ်မဟာ ၅ အတွင်း တိုက်ပွဲတွေ ဆက်လက်ပြီးပိုမို ပြင်းထန်လာနိုင်တယ်လို့ ကေအန်အယ်လ်အေ တပ်မဟာ ၅ ပြောခွင့်ရ ဒုဗိုလ်မှူးကြီး စောကလယ်ဒိုက ပြောဆိုထားပါတယ်။

ဇူလိုင်လအတွင်း နှစ်ဖက်တိုက်ပွဲပေါင်း ၁၃၄ ကြိမ်ဖြစ်ပွားခဲ့ရာမှာ စစ်ကောင်စီတပ်ဖွဲ့ဝင် ၈ ဦး အရှင်ဖမ်းမိပြီး၊ ၁၁၅ ဦးသေဆုံးကာ ၁၀၁ ဦး ဒဏ်ရာရရှိခဲ့သလို ကား ၂ စီးပျက်စီးပြီး မြင်း ၂ ကောင်သေဆုံးခဲ့ကာ  ၄ ကောင်ဒဏ်ရာရခဲ့တယ်လို့ ကေအန်ယူက သတင်းထုတ်ပြန်ထားပါ ​​သေးတယ်။

ကေအန်ယူ ​တပ်မဟာ ၂ ထိန်းချုပ်နယ်မြေအတွင်းမှာလည်း စစ်ကောင်စီရဲ့တပ်တွေက လက်ရှိ အင်အားတိုးချဲ့တာ၊ စစ်ရေးလှုပ်ရှားတာတွေ ပိုမိုပြုလုပ်လာတဲ့အပြင်  နှစ်ဖက်တိုက်ပွဲဖြစ်ပွားခဲ့တဲ့ ကျေးရွာအနီးမှာ ဝင်ထွက်သွားလာနေတဲ့အတွက် ကရင်ပြည်နယ်၊ သံတောင်ကြီးမြို့နယ်၊ စနေကုန်းရွာ ဒေသခံ ရွာသူရွားသားတွေဟာ တိုက်ပွဲထပ်မံဖြစ်ပွားလာမှာကို စိုးရိမ်ပြီး ထွက်ပြေးတိမ်းရှောင်နေကြတယ်လို့ ဒေသခံတွေဆီက သိရပါတယ်။

သြဂုတ် ၁၄ ရက်နေ့က စတင်ပြီး တောင်ငူ-ဘောကလိလမ်းပိုင်းမှာ နေ့စဥ် နှစ်ဖက်တိုက်ပွဲတွေဖြစ်ပွားခဲ့တဲ့အ​ပြင် စစ်ယာဥ်တန်းကိုပါ  မိုင်းဆွဲတိုက်ခိုက်ခံခဲ့ရတဲ့အတွက် စစ်ကောင်စီရဲ့ တပ်ဖွဲ့ဝင်တွေ သေဆုံး ဒဏ်ရာရရှိခဲ့သလို မော်တော်ယာဥ်တွေပါ ထိခိုက်ပျက်စီးခဲ့တာတွေရှိခဲ့တဲ့အတွက် အခုလို စစ်ရေးလှုပ်ရှားမှုတွေ ပိုမိုလုပ်ဆောင်လာတာ ဖြစ်နိုင်တယ်လို့ ဒေသခံတွေက ပြောပါတယ်။ 

စ​နေကုန်းရွာသား ဒေသခံတစ်ဦးက "EAO တွေဘက်ကလည်း မနေနဲ့လို့ပြောထားတယ်။ ဒီကောင်တွေက သိတဲ့အတိုင်းပဲလေ။ သူတို့ကို ဘာအပြစ်မရှိလဲ လိုက်လုပ်မှာပဲ။ အခုက ရွာသားတွေက ခြံထဲမနေရဲဘူး။ တိမ်းရှောင်နေရတယ်"လို့ ဆိုပါတယ်။ 

လက်ရှိချိန်မှာ တပ်မဟာ ၂ ထိန်းချုပ်နယ်မြေအတွင်းကို စစ်ကောင်စီဘက်က အင်အားပိုမိုဖြည့်တင်း​ပြီး လှုပ်ရှားလာနေတဲ့အတွက် တိုက်ပွဲ​တွေ ပိုမိုပြင်းထန်းလာနိုင်တယ်လို့ တပ်မဟာ၂ တပ်မှူးတစ်ဦးက သတိပေးပြောဆိုထားပါတယ်။ 

ဒေသခံတွေအနေနဲ့ တောင်ယာစပါး၊ ချဥ်ပေါင်ဖာလာ၊ ဒူးရင်း၊ ငှက်ပျော စတဲ့ ဥယျာဥ်ခြံ လုပ်ငန်းခွင်​တွေကနေ စွန့်ခွာပြီး တိမ်းရှောင်နေရတဲ့အတွက် စားသောက်ရေးအပြင် မိုးတွင်းကာလ နေထိုင်ရေးနဲ့ ကျန်းမာရေးအတွက် စိုးရိမ်ရတယ်လို့ စစ်ရှောင်တွေအရေး ကူညီဆောင်ရွက်ပေးနေတဲ့ ကရင်လူငယ်တစ်ဦးက ပြောပါတယ်။