အမေရိကန်အစိုးရဟာ ဖှိုက်ဇာဘိုင်အိုအန်တက်ခ် ကာကွယ်ဆေးထိုးဆေးလုံးရေ ၁ သန်းကို ဗီယက်နမ်နိုင်ငံအတွက် လှူဒါန်းမယ်လို့ ဒုသမ္မတ ကာမာလာဟာရစ်က ဗီယက်နမ်ဝန်ကြီးချုပ် ဖမ်မင်းချင်းကို သြဂုတ် ၂၅ ရက်မှာ ပြောလိုက်ပါတယ်။

ဟနွိုင်းမြို့မှာ ကျင်းပတဲ့ နှစ်နိုင်ငံခေါင်းဆောင်တွေ အစည်းအဝေးအတွင်း ခုလို ပြောလိုက်တာပါ။ တရုတ်ဆန့်ကျင်ရေးခံစားချက် အားကောင်းတဲ့ ဗီယက်နမ်ဟာ တရုတ်ဆီက ကာကွယ်ဆေး ထိုးဆေး ၂ ဒသမ ၇ သန်းလောက်ကို မကြာခင်ကမှ ရထားတာပါ။

ဗီယက်နမ် ဝန်ကြီးချုပ်က ကမ္ဘာ့ကျန်းမာရေးအဖွဲ့ WHO ရဲ့ အကြီးအကဲဆီကို သြဂုတ် ၂၄ ရက်က စာတစောင်ပေးပို့ခဲ့ပြီး WHO ရဲ့ ကိုဗက်စ်ကာကွယ်ဆေး မျှဝေရေး အစီအစဉ်အရ ဗီယက်နမ်ကို အများဆုံးပေးနိုင်တဲ့ ကာကွယ်ဆေးတွေ အမြန်ဆုံး ဦးစားပေးပို့ပေးဖို့ တိုက်တွန်းခဲ့ပါတယ်။

အင်္ဂါနေ့က ဝန်ကြီးချုပ်နဲ့ အစည်းအဝေးအတွင်း တရုတ်သံအမတ်ကြီးက တရုတ်ဟာ နောက်ထပ် ကာကွယ်ဆေး ထိုးဆေးလုံးရေ ၂ သန်း ထပ်လှူမယ်လို့ ပြောခဲ့ပါသေးတယ်။

ဗီယက်နမ်နဲ့ အမေရိကန်ကြား ဆက်ဆံရေး ဟာ ၁၉၇၅ ဗီယက်နမ် စစ်ပွဲအပြီး အနှစ်လေးဆယ်ကျော်အတွင်း ပိုနီးကပ်လာခဲ့ပါတယ်။ ဒါပေမဲ့ ဗီယက်နမ်အစိုးရက လူ့အခွင့်အရေးနယ်ပယ်မှာ ပိုတိုးတက်အောင် မလုပ်မချင်း ဆက်ဆံရေးမှာ အကန့်အသတ် ရှိနေမယ်လို့ အမေရိကန်က ပြောထားပါတယ်။

ဗီယက်နမ်ဟာ အမေရိကန်နဲ့ ဗျူဟာမြောက် မိတ်ဖက် အဆင့်အထိ သံတမန် ဆက်ဆံရေး တိုးမြှင့်ချင်ပေမဲ့ တရုတ်အစိုးရ ဒေါသထွက်မှာကို စိုးရိမ်နေတယ်လို့ အကဲခတ်တွေက ပြောပါတယ်။