ယူကရိန်းနိုင်ငံရဲ့  နယ်စပ်တွေနားမှာ ရုရှားစစ်တပ် အင်အားတိုးချနေလို့ သတိထားတဲ့အနေနဲ့ မြို့တော် ကိယက်ဗ်နားက လေထီးတပ်ဖွဲ့တွေ စစ်ရေးလေ့ကျင့်နေတယ်လို့ ယူကရိန်း ကာကွယ်ရေး ဝန်ကြီးဌာနက နိုဝင်ဘာ ၂၂ ရက်မှာ ပြောလိုက်ပါတယ်။

အရေးပေါ်ပစ်မှတ်တွေကို တိုက်ခိုက်မှုဖို့ သံချပ်ကာကားတွေနဲ့ လေထီးတပ်တွေ ဆင်းသက်လာပုံကို စစ်​ရေးလေ့ကျင့်ခဲ့တာလို့ ကြေညာချက်ထဲမှာ စစ်တပ်က ပြောပါတယ်။

လေယာဉ်တွေ ရဟတ်ယာဉ်တွေပေါ်ကနေ စစ်သည်တွေ ဆင်းသက်လာပုံ ရုပ်သံတွေကိုလည်း ဖြန့်ချိခဲ့ပါတယ်။ အရင်အပတ်က ယူကရိန်း ကမ်းတက်တပ်ဖွဲ့ဝင်တွေဟာ ရုရှားက ကျူးကျော်ခဲ့တဲ့ ခရိုင်းမီးယားနဲ့ နယ်စပ်နားမှာ စစ်ရေးလေ့ကျင့်ခဲ့ပါသေးတယ်။

ရုရှားဟာ ယူကရိန်းနယ်စပ်တွေမှာ စစ်သည်အင်အား ၉၂,၀၀၀ ကျော် ထပ်ပြီး တပ်ချထားခဲ့ပြီး ဇန်နဝါရီလကုန်ပိုင်း ဒါမှမဟုတ် ဖေဖော်ဝါရီလဆန်းပိုင်းမှာ တိုက်ခိုက်ဖို့ ပြင်ဆင်နေတယ်လို့ ယူကရိန်း စစ်ထောက်လှမ်းရေး အကြီးအကဲ ကေရယ်လို ဘူဒါနော့ဗ်က the Military Times သတင်းဌာနကို ဒီသီတင်းပတ်ကုန်ရက်မှာ ပြောပါတယ်။

တိုက်ခိုက်တဲ့အခါ လေကြောင်းတိုက်ခိုက်တာ၊ အမြောက်နဲ့ သံချပ်ကာ တိုက်ခိုက်မှုတွေအပြင် နိုင်ငံအရှေ့ပိုင်းမှာ လေထီးတပ်တွေနဲ့ တိုက်တာ၊ ဩဒတ်ဆာနဲ့ မာရိုင်ပူမြို့တွေမှာ ကမ်းတက် တိုက်ပွဲတွေ ဆင်နွှဲတာနဲ့ အိမ်နီးချင်း ဘဲလာရုစ်နိုင်ငံကနေ အသေးစား ကျူးကျော် ဝင်ရောက်တာတွေ ပါနိုင်တယ်လို့ ယူကရိန်း ထောက်လှမ်းရေး အကြီးအကဲက ပြောပါတယ်။

ရုရှားအစိုးရကတော့ ဒီစကားတွေကို ပယ်ချပြီး ယူကရိန်းက လက်နက်တွေ အရေအတွက် အမြောက်အမြား ပံ့ပိုးခံထားရသလို တပ်တွေ တိုးချဲ့တည်ဆောက်နေတာကို သူတို့ သတိထားမိတယ်လို့ နိုဝင်ဘာ ၂၂ ရက်နေ့က ပြောပါတယ်။

မြောက်အတ္တလန္တိတ် စစ်ရေးမဟာမိတ်အဖွဲ့ဝင်ဖြစ်ဖို့ ကြိုးစားနေတဲ့ ယူကရိန်းဟာ ဒီနှစ် အစောပိုင်းက အမေရိကန်စစ်လက်နက်ပစ္စည်းတွေကို အသုတ်လိုက် လက်ခံရရှိနေတာပါ။

ဂျာဗေလင် တင့်ဖျက်ဒုံးကျည်တွေလည်း ပါလို့ ရုရှားအစိုးရက ဝေဖန်ပြစ်တင်ခဲ့သလို တနေ့မှာ ယူကရိန်းက နေတိုးအဖွဲ့ကို ဝင်ခဲ့ပါက ပြင်းထန်တဲ့ လုံခြုံရေး စိုးရိမ်စရာ ဖြစ်လာမယ်လို့ ပြောခဲ့ပါတယ်။