စစ်ကိုင်းတိုင်း၊ မုံရွာမြို့၊ ထင်းရူးလမ်းနဲ့ အောင်မြေလမ်းကြားမှာ ဖွင့်လှစ်ထားရှိတဲ့ အမျိုးသားဒီမိုကရေစီဖွဲ့ချုပ်ပါတီ (တိုင်းရုံး)ကို ဒီဇင်ဘာ ၁၀ ရက်ညပိုင်းမှာ စစ်ကောင်စီတပ် ဗုံးခွဲဖျက်ဆီးသွားတယ်လို့ ဒေသခံတွေထံက သိရပါတယ်။

"ည ၈ နာရီခွဲမှာ စစ်ကား ၂ စီး ရောက်လာတယ်။ အရင်ဆုံး သေနတ်တွေနဲ့ ပစ်ခတ်နေတယ်။ သေနတ်နဲ့ပစ်ပြီး ဗုံး ၂ လုံးခွဲ သွားတယ်။ အသံအကျယ်ကြီး ကြားရတယ်” လို့ အနီးပတ်ဝန်းကျင်ပြည်သူတစ်ဦးက ပြောပါတယ်။ 

ဒေသခံတစ်ဦးကလည်း “ရုံးက ပျက်စီးသွားနိုင်တယ်။ ညဘက်ဆိုတော့ သွားမကြည့်ရဲဘူး။ အခုထိ စစ်တပ်က ရှိနေတယ်”လို့  ပြောပါတယ်။

စစ်ကိုင်းတိုင်း  အန်အယ်လ်ဒီတိုင်းရုံး ဗုံကွဲမှုကြောင့်  ထိခိုက်ပျက်စီးမှု အခြေအနေကိုတော့ အသေးစိတ်မသိရသေးပါဘူး။

အဆိုပါရုံးကို မုံရွာမြို့မှာ ၂၀၁၉ ခုနှစ်က စတင်ဖွင့်လှစ်ခဲ့တာဖြစ်ပြီး ပြီးခဲ့တဲ့ ဖေဖော်ဝါရီ ၁ ရက် စစ်တပ်အာဏာသိမ်းပြီးကတည်းက ရုံးပိတ်ထားခဲ့တာ ဖြစ်ပါတယ်။

အာဏာသိမ်းစစ်တပ်က အန်အယ်လ်ဒီခေါင်းဆောင်တွေကို ဖမ်းဆီး ထောင်ချနေသလို  နိုင်ငံတဝန်းမြို့နယ်တွေ ကျေးရွာတွေရှိ  အန်အယ်လ်ဒီပါတီရုံးတွေကို ဗုံးခွဲတာ၊ မီးရှို့တာနဲ့ ဝင်ရောက်ဖျက်ဆီးတာ၊ ချိပ်ပိတ်တာတွေ ဆက်တိုက်လုပ်ဆောင်နေတာ ဖြစ်ပါတယ်။