ပိုလန်နိုင်ငံ လွှတ်တော်က နိုင်ငံခြားမီဒီယာတွေကို မောင်းထုတ်ဖို့ ရည်ရွယ်တဲ့ မီဒီယာဥပဒေကြမ်းကို ရုတ်တရက် ပြဋ္ဌာန်းလိုက်တာကြောင့် နိုင်ငံအနှံ့ ကန့်ကွက်ဆန္ဒပြနေကြပါတယ်။

ပိုလန်ရှိ အမေရိကန်ရုပ်သံကုမ္ပဏီ Discovery Inc ပိုင်တဲ့ channel TVN24 ကို မောင်းထုတ်ဖို့ အဓိကရည်ရွယ်တဲ့ ဥပဒေကြမ်းဖြစ်ပြီး အဲဒီမီဒီယာဥပဒေကြမ်းကို သမ္မတက ဗီတိုသုံးပယ်ချပေးဖို့ ဆန္ဒပြသူ ၂ သန်းနီးပါး လက်မှတ်ရေးထိုး တောင်းဆိုခဲ့ပါတယ်။ 

ဝါဆောမြို့ သမ္မတအိမ်တော်အပြင်ဘက်မှာ ဆန္ဒပြနေသူတွေကို အတိုက်အခံနိုင်ငံရေးခေါင်းဆောင် ရာဖယ်လ် ထရာကော့စကီး (Rafal Trzaskowski) က “ပိုလန်မှာ  ကွန်မြူနစ်အာဏာရှင်စနစ် အုပ်စိုးခဲ့တဲ့ကာလကို  မမေ့ကြပါနဲ့၊ အခု ဥပဒေဟာ အတိတ်ကလိုပဲ မီဒီယာအားလုံးကို အစိုးရက ဆင်ဆာလုပ်ဖို့ ခြေလှမ်းလာတာ၊ ပိုလန် ဒီမိုကရေစီအနာဂတ်အတွက် စိုးရိမ်စရာပါ” လို့ ပြောပါတယ်။ TVN ရုပ်သံဟာ ပိုလန်မှာ အကြီးဆုံးပုဂ္ဂလိကမီဒီယာဖြစ်ပြီး အခြားမီဒီယာတွေအားလုံးက သူ့ဘက်က ရပ်တည်ကြပါတယ်။
လက်ရှိ အာဏာရ Law and Justice ပါတီကတော့ နိုင်ငံခြားမီဒီယာတွေ ပြည်တွင်းမှာ ချဲ့လွန်း ပြဿနာရှာလွန်းတယ်လို့ စွပ်စွဲပါတယ်။