ပြင်သစ်နိုင်ငံမှာ ကာကွယ်ဆေး မထိုးထားတဲ့ ကိုဗစ်-၁၉ ကပ်ရောဂါ ကူးစက်ခံလူနာတွေ ဆေးရုံတွေရဲ့ အထူးကြပ်မတ်ကုသဆောင်မှာ ပြည့်လျှံနေတယ်လို့ ဒီဇင်ဘာ ၂၀ ရက်နေ့ ရိုက်တာသတင်းမှာ ဖော်ပြထားပါတယ်။

ကိုဗစ်-၁၉ ကပ်ရောဂါ ကူးစက်မှု ပဉ္စမလှိုင်းကို ပြင်သစ်နိုင်ငံက ရင်ဆိုင်နေရလို့ အရင်အပတ်က စပြီး ဆေးရုံတွေမှာ ဖိအား ပုံမှန်တိုးလာနေတယ်လို့ ဆိုပါတယ်။

မာဟောက်စ် ဆေးရုံရဲ့ အထူးကြပ်မတ်ကုသဆောင်ကို ရောက်လာသူ ကိုဗစ်ကူးစက်ခံ လူနာ အယောက် ၂၀ မှာ ၃ ယောက်သာ ကာကွယ်ဆေးထိုးပြီးသား လူတွေဖြစ်တယ်လို့ ဆေးရုံအုပ်က ပြောပါတယ်။

ပြီးခဲ့တဲ့ ရက် ၂၀ အတွင်း  လူနာ ၇၀ ရာခိုင်နှုန်းက ကိုဗစ်-၁၉ ကပ်ရောဂါ ကူးစက်ခံထားရသူတွေ ဖြစ်တယ်လို့ ဆေးရုံအုပ်က ဆိုပါတယ်။

ပြင်သစ်နိုင်ငံမှာ ဒီဇင်ဘာ ၁၆ ရက်နေ့ ၂၄ နာရီအတွင်း အသစ်ကူးစက်ခံ လူဦးရေ ၆၈၆၆၀ ယောက် ထိ စံချိန်တင် မြင့်တက်ခဲ့တာပါ။ 

ပြင်သစ်ပြည်သူ ၇၈ ဒသမ ၁ ရာခိုင်နှုန်းဟာ အနည်းဆုံး တကြိမ် ကိုဗစ်-၁၉ ကပ်ရောဂါ ကာကွယ်ဆေး ထိုးပြီးသားလို့ ပြင်သစ်ကျန်းမာရေး ဝန်ကြီးဌာနက ထုတ်ပြန်ထားပါတယ်။