စပါးအသင်းအတွက် ဆုဖလားတစ်လုံးရယူနိုင်ဖို့ ခက်ခဲကြောင်း ကရာဘောင်းဖလားဆီမီးဖိုင်နယ် တက်ရောက်နိုင်ခဲ့အပြီးမှာ  နည်းပြကွန်တီက ပြောပါတယ်။

စပါးအသင်းဟာ ကွာတားဖိုင်နယ်မှာ ဝက်စ်ဟမ်းကို ၂ ဂိုး ၁ဂိုးနဲ့အနိုင်ရခဲ့ပြီးနောက် ဆီမီးဖိုင်နယ်မှာ ချဲလ်ဆီးနဲ့ တွေ့ဆုံနေပါတယ်။ တဖက် ဆီမီးဖိုင်နယ်မှာတော့ လစ်ဗာပူး နဲ့အာဆင်နယ်တို့ ကစားရမှာဖြစ်ပြီး နှစ်ကျော့ ကစားသွားရမှာပါ။

စပါးအသင်းအတွက် ထိပ်တန်းအသင်းတွေနဲ့အတူ ဆီမီးဖိုင်နယ်တက်ရောက်နိုင်ခဲ့တာက ကောင်းမွန်ပေမဲ့ ဆုဖလားရဖို့အတွက်တော့ ခက်ခဲလိမ့်မယ်လို့ ကွန်တီကပြောပါတယ်။

“ကျနော်ချဲလ်ဆီးမှာတုန်းကလည်း ဒီဖလားကို ဒုတိယဦးစားပေးလို့ သတ်မှတ်မထားပေမဲ့ လူငယ်တွေကိုအသုံးပြုခဲ့တယ်။ အခုချိန်မှာ အင်္ဂလန်မှာ ဆုဖလားတစ်လုံးရဖို့က အလွန်ခက်ခဲလာပြီလို့မြင်တယ်။ ကျနော်တို့ဟာ မန်ယူနိုက်တက်နဲ့ မန်စီးတီးတွေကို အနိုင်ယူခဲ့တဲ့ ဝက်စ်ဟမ်းကိုအနိုင်ရခဲ့တာက အရေးပါခဲ့တယ်။ ဖလားရဖို့တော့ အတော်လေးခက်ခဲလိမ့်မယ်” လို့ နည်းပြကွန်တီကပြောသွားပါတယ်။

စပါးအသင်းဟာ ၂၀၀၇-၂၀၀၈ ဘောလုံးရာသီက ကရာဘောင်းဆုဖလားရယူနိုင်ခဲ့ပြီးနောက် လက်ရှိအချိန်အထိ ဆုဖလားလက်မဲ့ဖြစ်နေခဲ့ပါတယ်။