ကေအိုင်အေနဲ့ စစ်ကောင်စီတပ်တို့  တိုက်ပွဲပြင်းထန်ခဲ့တဲ့ ကချင်ပြည်နယ်၊ ဖားကန့်မြို့နယ် နန့်ယားတောင်ပိုင်း မာနော့မှော်ကျေးရွာဘက်မှာ ဖေဖော်ဝါရီ ၄ ရက်   ညနေပိုင်းနဲ့ ညနက်ပိုင်း အချိန်တွေမှာ စစ်ကောင်စီဘက်က ဂျက်လေယာဉ်နဲ့ လာရောက် ပစ်ခတ်ခဲ့တယ်လို့ ဒေသခံတွေက ပြောပါတယ်။ 

မာနော့မှော်ကျေးရွာဘက်မှာ ဖေဖော်ဝါရီ ၃ ရက် ညနေ ၅ နာရီလောက်ကစပြီး တိုက်ပွဲ စတင်ဖြစ်ပွားခဲ့ကာ ညပိုင်း တိုက်ပွဲငြိမ်သွားခဲ့ပေမဲ့  ဖေဖော်ဝါရီ ၄ ရက် မနက် ၇ နာရီလောက်က စပြီး တိုက်ပွဲပြင်းထန်ခဲ့တာပါ။ 

ဒေသခံတစ်ဦးက “ကေအိုင်အေနဲ့ စစ်တပ်နဲ့တိုက်ပွဲက တစ်နေကုန်ဖြစ်တာ။ တိုက်ပွဲဖြစ်နေတုန်း နေ့လယ် ၁၂ လောက်ကလည်း လေယာဉ်နဲ့ ပစ်ကြတာ။ ဂျက်လေယာဉ် ၂ စီးနဲ့ လာပစ်တယ်။ ရဟတ်ယာဉ်နဲ့ ပြန်လာပစ်တယ်။ ၃ နာရီကျတော့တစ်ခါ ဂျက်လေယာဉ်နဲ့ လာပစ်ပြန်တယ်။ တိုက်ပွဲ နည်းနည်းငြိမ်သွားတဲ့ ညနေ ၄ နာရီခွဲလောက်ကျ ဂျက်လေယာဉ် ၃ စီးနဲ့ တစ်ခါလာပစ်တယ်။ ဒီမနက်ပိုင်း ၁ နာရီမှာ တစ်ခါ ဂျက်လေယာဉ်နဲ့ ပြန်လာပစ်ပြန်တယ်။ မနေ့က တိုက်ပွဲဖြစ်တုန်းက နန့်ယားက စစ်ကောင်စီတပ်တွေ လက်နက်ကြီးနဲ့ အချက် ၃၀ကျော် တိုက်ပွဲဖြစ်တဲ့ဘက်ကို ပစ်ကူတော့ အနီးအနားက ရွာတွေမှာလည်း လက်နက်ကြီးကျတာတွေ ရှိတယ်ကြားတယ်” လို့ ပြောပါတယ်။ 

ကေအိုင်အေနဲ့ တိုက်ပွဲဖြစ်ပွားခဲ့တဲ့ စစ်ကောင်စီတပ်ဖွဲ့ဟာ ဇန်နဝါရီ ၂ ရက်က ကားမိုင်းမြို့ဘက်က တက်လာတဲ့ ခမရ (၁၁၁) အဖွဲ့ဖြစ်ပြီး အင်အား ၁၀၀ လောက်ရှိကာ ကေအိုင်အေ တပ်မဟာ ၉ လက်အောက် တပ်ရင်း ၄၄ အဖွဲ့နဲ့ PDF အဖွဲ့တို့နဲ့ လမ်းမှာ စစ်ကြောင်းဆုံတွေ့ခဲ့ပြီး တိုက်ပွဲဖြစ်တာလို့ သိရပါတယ်။ 

စစ်ကောင်စီတပ်တွေဘက်က အထိအခိုက် ကျဆုံးများတဲ့အတွက် အခုလို လေယာဉ်နဲ့ လာပစ်ကူတာ ဖြစ်နိုင်တယ်လို့လည်း ဒေသခံတဦးက ခန့်မှန်းပြောပါတယ်။

တိုက်ပွဲအတွင်း ပြည်သူတွေ ထိခိုက်မှုမရှိခဲ့ပေမဲ့ အနီးအနားရွာတွေက ပြည်သူ ၁၀၀ လောက် ဆိုင်းဖရာရွာဘက် စစ်ဘေးရှောင်ခဲ့ရပါတယ်။ 

တိုက်ပွဲဖြစ်ပွားခဲ့တဲ့နေရာဟာ ဖားကန့်သွားလမ်းမပေါ်ရှိ ဆိုင်းဖရာကျေးရွာရဲ့ မြောက်ဘက်ခြမ်းရှိ ၃ မိုင်ခန့်ဝေးတဲ့ နေရာမှာ ဖြစ်တယ်လို့ သိရပါတယ်။