မကွေးတိုင်း ရေစကြိုမြို့နယ်မှာ ဖေဖော်ဝါရီ ၂၈ ရက်နေ့ မနက်ပိုင်းက စစ်ကောင်စီယာဥ်တန်းကို မိုင်းဆွဲတိုက်ခိုက်ခဲ့တယ်လို့ ရေစကြိုမြောက်ပိုင်း N-YSO ပြောက်ကျားတပ်ဖွဲ့က ပြောပါတယ်။

ရေစကြိုမြို့နယ် ပခုက္ကူ-ချောင်းဦးကားလမ်းမှာ မနေ့ မနက် ၁၁ နာရီလောက်က ကား ၃ စီးအပါအဝင် အင်အား ၅၀ လောက်နဲ့ ခြေလျင်စစ်ကြောင်းထိုးလာတဲ့ စစ်ကောင်စီတပ်ကို မိုင်းဆွဲတိုက်ခိုက်ရာမှာ စစ်ကောင်စီတပ်သား ၅ ယောက်မိုင်းထိမှန်ပြီး ဖောကားတစ်စီး ခေါင်းပိုင်း ပျက်စီးသွားတယ်လို့ N-YSO ပြောက်ကျားတပ်ဖွဲ့ရဲ့ ပြန်ကြားရေးတာဝန်ခံက ဒီဗွီဘီကို ပြောပါတယ်။

ကားနဲ့ စစ်ကြောင်းတစ်ကြောင်း၊ ခြေလျင်စစ်ကြောင်းတစ်ကြောင်းနဲ့လာတဲ့ စစ်ကောင်စီတပ်နဲ့ ပျူစောထီးတွေကို ချောင်းဦး PDF၊ ငဘ ဒေသကာကွယ်ရေးပြောက်ကျားတပ်တို့နဲ့ ပူးပေါင်းပြီး ပဒေသာမိုင်းဆွဲ တိုက်ခိုက်ခဲ့တာလို့ ဆိုပါတယ်။

စစ်ကောင်စီတပ်ဘက်က ထိခိုက်သေဆုံးသူ များပြားနိုင်ပေမဲ့ အတိအကျ အတည်မပြုနိုင်ဘဲ ဒေသကာကွယ်ရေး မဟာမိတ်တပ်ဖွဲ့တွေဘက်က အထိခိုက်အကျဆုံးမရှိဘဲ ဆုတ်ခွာနိုင်ခဲ့ကြတယ်လို့ ပြောပါတယ်။

စစ်ကောင်စီတပ်တွေဟာ မိုင်းဆွဲတိုက်ခိုက်ခံရပြီး လမ်းမှာတွေ့တဲ့ အပြစ်မဲ့ ပြည်သူတစ်ယောက်ကိုလည်း မတရား ဖမ်းဆီးသွားကြတယ်လို့ ဆိုပါတယ်။

ပခုက္ကူ-ချောင်းဦး ကားလမ်းပေါ်မှာ ဖေဖော်ဝါရီ ၂၅ ရက်နေ့ကလည်း စစ်ကောင်စီယာဥ်တန်းကို N-YSO ပြောက်ကျားတပ်ဖွဲ့က မိုင်းဆွဲတိုက်ခိုက်ခဲ့ပြီး ထိခိုက်ကျဆုံးမှုအခြေအနေကိုတော့ မသိရသေးပါဘူး။