မန္တလေး၊ ပြည်ကြီးတံခွန်မြို့နယ်နဲ့ ချမ်းမြသာစည်မြို့နယ်တို့မှာ မေလ ၁ ရက် နေ့လယ်ပိုင်းက စစ်ကောင်စီတပ်သားတွေရဲ့ စစ်ဆေးရေးဂိတ် တခုနဲ့ ကားတစီး ဗုံးဖောက်ခွဲတိုက်ခိုက်ခံခဲ့ရပါတယ်။

ပြည်ကြီးတံခွန်မြို့နယ် ရန်ကုန် - မန္တလေးလမ်းဟောင်းနဲ့ ယောမင်းကြီးလမ်းရှိ ကနောင် စစ်ကောင်စီတပ်သားတွေရဲ့ဂိတ်ကို နေ့လယ် ၂ နာရီ က Guerilla Force Of Mandalay(GRA) နဲ့ Eagle Brothers People’s Defence MDY အဖွဲ့တို့ ပူးပေါင်းကာ ဗုံးနဲ့ပစ်ခဲ့ပြီး  ထိခိုက်ဒဏ်ရာရသူ ရှိမရှိတော့  မသိရဘူးလို့ Guerilla Force Of Mandalay(GRA) က ထုတ်ပြန်ထားပါတယ်။

ချမ်းမြသာစည်မြို့နယ် ၇၃ လမ်း ၁၀၇ လမ်း အနီးမှာလည်း စစ်ကောင်စီတပ်ကားတစီးကို နေ့လယ် ၂ နာရီကျော်က Mandalay Youth Special Force (MYSF) က အဝေးထိန်းနဲ့ ဖောက်ခွဲတိုက်ခိုက်ခဲ့တယ်လို့ သိရပါတယ်။

ဒီလို ဖောက်ခွဲတိုက်ခိုက်မှုကြောင့် စစ်တပ်က ကားတစီး ထိခိုက်ပျက်စီးတဲ့အပြင် စစ်ကောင်စီတပ်သားတချို့ ထိခိုက်ဒဏ်ရာရနိုင်တယ်လို့ Mandalay Youth Special Force (MYSF) က ထုတ်ပြန်ထားပါတယ်။