ချန်ပီယံလိဂ်ပြိုင်ပွဲကနေ ထွက်ခဲ့ရပြီးနောက် ပထမဆုံးလိဂ်ပွဲစဉ်မှာ မက်ဆီနဲ့ နေမာတို့ကို ပီအက်စ်ဂျီ ပရိသတ်တွေက လှောင်ပြောင်ခဲ့ကြပါတယ်။ 

ပီအက်စ်ဂျီအသင်းဟာ ချန်ပီယံလိဂ် ၁၆ သင်းအဆင့်မှာ ရီးရဲလ်မက်ဒရစ်ကိုရှုံးနိမ့်ပြီး ပြိုင်ပွဲကနေထွက်ခဲ့ရတာပါ။ 

မနေ့က ကစားသွားခဲ့တဲ့ ဘော်ဒိုးအသင်းနဲ့ ပြင်သစ်လီဂူးဝမ်းပွဲစဉ်မှာ ပီအက်စ်ဂျီက ၃ ဂိုး ဂိုးမရှိ နဲ့ အနိုင်ရခဲ့ပေမယ့် ပွဲမစခင် အသင်းသားတွေရဲ့ အမည်ကို ကြေညာရာမှာ ပရိသတ်တွေက မက်ဆီနဲ့ နေမာကို ပစ်မှတ်ထားပြီး လှောင်ပြောင်ခဲ့ကြတာပါ။ 

မက်ဒရစ်နဲ့ ၂ ကျော့မှာ ၂ ဂိုးသွင်းခဲ့တဲ့ အမ်ဘာပေရဲ့အမည် ကြေညာချိန်မှာ ပရိသတ်တွေက လက်ခုပ်တီးအားပေးခဲ့ကြပေမယ့် မက်ဆီနဲ့ နေမာတို့ရဲ့အမည်တွေ ကြေညာချိန်မှာတော့ အော်ဟစ် လှောင်ပြောခဲ့ကြတာပါ။ 

ဘော်ဒိုးနဲ့ ပွဲစဉ်မှာ တိုက်စစ်မှူးနေမာက ၁ ဂိုးသွင်းခဲ့ပေမယ့် အောင်ပွဲခံခြင်းမရှိခဲ့သလို ပရိသတ်တွေထဲကနေလည်း အော်ဟစ်လှောင်ပြောင်မှုတွေရှိခဲ့ပါတယ်။ 

ပီအက်စ်ဂျီအသင်းဟာ ပထမအကျော့အိမ်ကွင်းမှာ မက်ဒရစ်ကို ၁ ဂိုး ဂိုးမရှိနဲ့အနိုင်ရခဲ့ပြီး ဒုတိယ အကျော့မှာလည်း ဦးဆောင်ဂိုးစရခဲ့ပေမယ့် ဒုတိယပိုင်းမှာ ၁၇ မိနစ်အတွက် ၃ ဂိုး ပေးခဲ့ရပြီး နှစ်ကျော့ပေါင်းရလဒ် ၃ ဂိုး ၂ ဂိုး နဲ့ ပြိုင်ပွဲကနေ ထွက်ခွာခဲ့ရပါတယ်။ 

ပီအက်စ်ဂျီဟာ ပြည်တွင်းလိဂ်မှာတော့ ပွဲစဉ် ၂၈ ပွဲအပြီးမှာ ဒုတိယနေရာက နိုက်စ်အသင်းကို ၁၅ မှတ်အထိဖြတ်ပြီး ချန်ပီယံဖြစ်ဖို့ သေချာသလောက်ရှိနေပါတယ်။