ကရင်အမျိုးသားအစည်းအရုံး (ကေအန်ယူ) တပ်မဟာ ၅ နယ်မြေ၊ ဖာပွန်(မူတြော်)ခရိုင်မှာ မတ်လအတွင်း စစ်ကောင်စီရဲ့တပ်နဲ့ KNAL တပ်တို့ တိုက်ပွဲပေါင်း ၁၆၇ ကြိမ်ဖြစ်ပွားခဲ့ရာ စစ်ကောင်စီပူးပေါင်းတပ်ဘက်က ၅၄ ဦးသေဆုံးပြီး၊ ၄၀ ဦးဒဏ်ရာရရှိခဲ့တယ်လို့  မတ် ၁၆ ရက်က ကေအန်ယူက သတင်းထုတ်ပြန်ပါတယ်။

မတ် ၁ ရက်မှ မတ် ၁၅ ရက်အထိ တိုက်ပွဲပေါင်း ၁၆၇ ကြိမ်ဖြစ်ပွားခဲ့တာမှာ စစ်ကောင်စီတပ်နဲ့ နယ်ခြားစောင့်တပ်(BGF) ဘက်က  စစ်သုံးယာဉ် ၁၂ စီးကို ဖျက်ဆီးနိုင်ခဲ့တဲ့အပြင် မြင်းလား ၂ ကောင် ရှင်းလင်းနိုင်ခဲ့တယ်လို့ဆိုပါတယ်။ ကရင်အမျိုးသားလွတ်မြောက်ရေးတပ်မတော်(KNLA) ဘက်ကတော့ တပ်ဖွဲ့ဝင် ၇ ဦးကျဆုံးပြီး၊  ၁၆ ဦး ထိခိုက်ဒဏ်ရာရရှိခဲ့တယ်လို့ ဆိုပါတယ်။

စစ်ကောင်စီဘက်က လေကြောင်းကနေ ဗုံးကြဲတိုက်ခိုက်ခဲ့ရာမှာ ဗုံးသီးပေါင်း ၁၇ လုံး ကြဲချခဲ့သလို လက်နက်ကြီး ၁၈၉ လုံးပစ်ခတ်ခဲ့တဲ့အတွက် အရပ်သားပြည်သူ ၁၅ ဦး သေဆုံးပြီး၊ ၄ ဦး ထိမှန်ဒဏ်ရာရရှိခဲ့တယ်လို့ ကေအန်ယူက ထုတ်ပြန်ထားပါတယ်။

မတ် ၁၁ ရက်က စစ်ကောင်စီရဲ့ ခလရ ၉၇ စစ်ကြောင်းကို KLNA ပူးပေါင်းတပ်ဖွဲ့တွေက  မယ်တရူလိုကျေးရွာအရောက်မှာ ကြားဖြတ်တိုက်ခိုက်ခဲ့တဲ့အတွက် တပ်ကြပ်ကြီးအပါအဝင် ၃ ဦးသေဆုံးပြီး၊ တပ်ခွဲမှူးအပါအဝင် ၁၁ ဦးဒဏ်ရာရရှိခဲ့ကာ ၂၇ ဦးအရှင်ဖမ်ဆီးခံခဲ့ရတဲ့အတွက် စစ်ကောင်စီက တပ်မဟာ ၅ နယ်မြေကို လူ၊ လက်နက်ခဲယမ်းဖြည့်တင်းပြီး စစ်ရေးလှုပ်ရှားမှုတွေ ပိုမိုလုပ်ဆောင်လာတယ်လို့ ကေအန်ယူ တာဝန်ရှိသူက ဆိုပါတယ်။

အခုလို စစ်ရေးလှုပ်ရှားမှုတွေကြောင့် နှစ်ဖက်တိုက်ပွဲတွေ ပိုမိုပြင်းထန်လာမှာကို ဒေသခံတွေက စိုးရိမ်နေရသလို စစ်ကောင်စီတပ်တွေက အရပ်သားပြည်သူတွေကို ဖမ်းဆီးနှိပ်စက်တာ၊ သတ်ဖြတ်တာ ကျေးရွာတွေကို မီးရှို့ဖျက်ဆီးတာတွေ လုပ်ဆောင်လာမှာကို စိုးရိမ်နေကြပါတယ်။