မတ် ၂၂ ရက်နေ့ မနက် ၁၀ နာရီလောက် စစ်ကောင်စီတပ်က လက်နက်ကြီးနဲ့ ပစ်ခတ်တာကြောင့် စစ်ကိုင်းတိုင်း၊ ရေဦးမြို့နယ်၊ တောင်ခွင်ကျေးရွာအုပ်စု၊ ထန်းဘဲလှကျေးရွာက စစ်ဘေးရှောင် အသက် ၈ နှစ်အရွယ် ကလေးငယ် ၁ ဦး သေဆုံးပြီး ၄ ဦး ဒဏ်ရာရရှိခဲ့တယ်လို့ ဒေသခံတွေက ပြောပါတယ်။
ရေဦးမြို့နယ် ချောင်းဆုံကျေးရွာကနေ ထန်းဘဲလှကျေးရွာကို အင်အား ၁၈၀ ကျော်နဲ့ စစ်ကြောင်းထိုးလာတဲ့ စစ်တပ်က ပစ်ခတ်ခဲ့တာလို့ ဆိုပါတယ်။
ထန်းဘဲလှကျေးရွာခံတဦးက “သူတို့လာတယ်လို့ သတင်းကြားရတာနဲ့ ရွာရှိလူကုန် အကုန် ရွာအပြင် ထွက်ပြေးပုန်းနေကြတယ်။ ကံဆိုးချင်တော့ဗျာ မင်းအောင်လှိုင် စစ်(-) တွေက ရွာထဲကို မဝင်ဘဲနဲ့ ရွာဘေးက သူတို့ကိုကြောက်လို့ ပုန်းနေတဲ့ ကျနော်တို့ရွာသားတွေရှိရာ စစ်ကြောင်းထိုးလာခဲ့တယ်။ သူတို့လည်း ရုတ်တရက်ကြီး ဝင်လာတယ်။ ကိုယ်တွေလည်း ရုတ်တရက် ထွက်ပြေးရတယ်ဗျ။ ဒီကောင်တွေ ကျနော်တို့ ပြေးတာကို မြင်ပြီး လက်နက်ကြီးနဲ့ လှမ်းထုတယ်။ ရွာက အသက် ၈ နှစ်ပဲရှိသေးတဲ့ မောင်ညီယံထွန်း သေဆုံးခဲ့ရတယ်။ နောက်ထပ် ရွာသား ၄ ဦးလည်း ဒဏ်ရာရတာတွေ ရှိတယ်ဗျ” လို့ ပြောပါတယ်။
စစ်ကောင်စီတပ်ဟာ ထန်းဘဲလှကျေးရွာက စစ်ရှောင်ရွာသား ၂၀ ကျော်ကိုလည်း ဖမ်းဆီးရိုက်နှက် စစ်ဆေးခဲ့ပြီး ညနေပိုင်း ပြန်လွှတ်ပေးခဲ့တယ်လို့ ဆိုပါတယ်။
ပြန်လွတ်လာသူအားလုံးဟာ ဒဏ်ရာပြင်းထန်စွာ ရရှိခဲ့ရတာကြောင့် လက်ရှိအချိန်မှာ ဆေးဝါးကုသမှု ခံယူနေရတယ်လို့ ဒေသခံတွေက ပြောပါတယ်။