ကမ္ဘောဒီးယားနိုင်ငံမှာ ကော်လ်စင်တာဝန်ထမ်းအဖြစ် လိမ်ညာခိုင်းစေခံနေရတဲ့ ထိုင်းလူမျိုးတွေကို ထိုင်းရဲနဲ့ ကမ္ဘောဒီးယားရဲတပ်ဖွဲ့တို့ ပူးပေါင်းပြီး ကယ်ထုတ်နေရာမှာ ပြီးခဲ့တဲ့ ဧပြီ ၁၀ ရက်နေ့က နောက်ထပ် ၃၁ ဦး ကယ်ထုတ်နိုင်ခဲ့တယ်လို့  ထိုင်းအမျိုးသားရဲတပ်ဖွဲ့ ဒုရဲချုပ်ကြီး ဆူရချေ့ ဟတ်ဖန်းက မနေ့သတင်းစာရှင်းပွဲမှာ ပြောပါတယ်။ 

ဒီတခေါက်ကယ်တင်မှုမှာ ဧပြီလ ၆ ရက်နေ့က စတင်ခဲ့ကြောင်း၊ စုံစမ်းမှုတွေပြုပြီးတဲ့နောက် ပြီးခဲ့တဲ့ ဧပြီ ၁၀ ရက်နေ့မှာတော့ ဖရသီဟနုမြို့ ရပ်ကွက် ၄ ရှိ  အဆင့်မြင့် ၁၀ ထပ်တိုက် တတိုက်ကို သွားရောက်စစ်ဆေးရာမှာ အထဲကလူတွေထွက်မပြေးနိုင်အောင် အစောင့်အကြပ်နဲ့ စီစီကင်မရာတွေပါ တပ်ထားတယ်လို့ဆိုပါတယ်။

မန်နေဂျာမှာ ကမ္ဘောဒီးယားအမျိုးသမီး ၁ ဦးဖြစ်ပြီး အထဲက ထိုင်းလူမျိုးတွေကို တွေ့ခွင့်မပေးကြောင်း၊   အဆိုပါထိုင်းလူမျိုးတွေဟာ ကုမ္ပဏီမှာ အကြွေးတင်နေလို့ ပြန်ထွက်ချင်ရင် ၁ ဦးကို အမေရိကန်ဒေါ်လာ ၁၅၀၀ ပေးရမယ်လို့ ပြောပါတယ်။

တာဝန်ရှိသူတွေနဲ့ အခြေအတင်ပြောဆိုရာမှာ တရုတ်အမျိုးသားတွေပါ လာရောက်ပြော ဆိုကြကြောင်း၊ တာဝန်ရှိသူတွေနဲ့ အချိန် ၈ နာရီကြာညှိနှိုင်းပြောဆိုပြီးမှ  ပိတ်လှောင်ခံနေရတဲ့ ထိုင်း၂၄ ဦးကို လွှတ်ပေးတယ်လို့ ဆိုပါတယ်။ 

အဲဒီနေ့မှာပဲ ၂ နိုင်ငံ ရဲတပ်ဖွဲ့ဝင်တွေက ဖနွမ်ပင်မြို့နယ်ရှိ နောက်ထပ်နေရာ ၂ နေရာကို သွားရောက်စစ်ဆေးရာမှာ ကော်လ်စင်တာက ကြိုတင်သတင်းရလို့ အခြားတနေရာကို ရှောင်ထွက်သွားကြောင်း၊ ထိုင်းအလုပ်သမား ၇ ဦးကိုတော့ လမ်းပေါ်မှာချထားခဲ့လို့ ခေါ်ခဲ့ရာမှာ စုစုပေါင်း ၃၁ ဦး ကယ်တင်နိုင်ခဲ့တယ်လို့ ဆိုပါတယ်။ 

အလိမ်ခံရသူတွေပြန်ပြောချက်အရ  ကမ္ဘောဒီးယားနိုင်ငံမှာ မပင်ပန်းဘဲနဲ့ ဝင်ငွေကောင်းတဲ့ ကောလ်စင်တာ အော်ပရေတာအလုပ်ရှိကြောင်း FaceBook, Twitter စတဲ့ လူမှုကွန်ရက်ကနေ ကြော်ငြာတဲ့အတွက် စိတ်ဝင်စားလို့လျှောက်ခဲ့ကြောင်း၊ တကယ်တမ်း ကမ္ဘောဒီးယားရောက်တဲ့ အခါ အခန်းထဲကနေ ဘယ်မှမထွက်ရဘဲ တယ်လီဖုန်းနဲ့ ကိုယ့်ထိုင်းလူမျိုး အချင်းချင်းဆီကနေ ရင်းနှီးမြှုပ်နှံငွေတွေ လိမ်တောင်းရကြောင်း၊ ဥပဒေနဲ့မညီတဲ့အလုပ် မလုပ်ချင်ဘူးလို့ပြောတဲ့အခါ  ကိုယ်ထိလက်ရောက်ရိုက်နှက်တာ၊ အခန်းထဲလှောင်ပိတ်ခံရတာ၊ တချို့က နောက်ထပ်ကုမ္ပဏီဆီ တဆင့်ပြန်ရောင်းစားခံရတာ၊ တချို့က ပြန်ပေးဆွဲခံရသလို ငွေနဲ့ပြန်ရွေးမှ လွှတ်ပေးတာတွေ ရှိ တယ်လို့ ဆိုပါတယ်။ 

အဲဒီလို ကော်လ်စင်တာအသုံးပြုပြီး အလိမ်ခံရတဲ့ငွေ  ဘတ်သန်းပေါင်းရာနဲ့ချီရှိကြောင်း၊ အလိမ်ခံရသူအများစုမှာ ထိုင်းလူမျိုးတွေဖြစ်ကြောင်း၊ ကော်လ်စင်တာရဲ့ ခေါင်းဆောင်ပိုင်းဟာ တရုတ်နိုင်ငံသားဖြစ်ပြီး ဂိုဏ်းခွဲတွေဟာ  အခြားနိုင်ငံတွေမှာလည်း ရှိတယ်လို့  ပြောပါတယ်။ 

ထိုင်းနဲ့ ကမ္ဘောဒီးယားရဲတပ်ဖွဲ့ဝင်တွေဟာ ဒီမတိုင်ခင်ကလည်း ကော်လ်စင်တာဝန်ထမ်းအဖြစ် အလိမ်ခေါ်ခံရသူ ၇၀၀ ခန့်ကို ကယ်ထုတ်ခဲ့သေးကြောင်း၊ စုံစမ်းထားတဲ့အချက်အလက်တွေအရ  ကော်လ်စင်တာမှာ နောက်ထပ် ထိုင်းလူမျိုး ၁၅၀၀ ကျော်ကျန်ရှိသေးတယ်လို့ ဆိုပါတယ်။

သူတို့တွေဟာ ဟိုတယ်တွေ၊ တိုက်ခန်းတွေ၊ အဆောက်အဦဟောင်းတွေမှာ နေနေရကြောင်း၊ သူတို့တွေကို ကယ်ထုတ်နိုင်ဖို့လည်း ဆက်လက်ကြိုးစားသွားမယ်လို့ ထိုင်းအမျိုးသားရဲတပ်ဖွဲ့က ပြောသွားပါတယ်။