မန်စီးတီးနဲ့ ကစားရမယ့် ချန်ပီယံလိဂ်ဆီမီးဖိုင်နယ်ပွဲစဉ်မှာ ခံစစ်ကစားပုံကောင်းမွန်ဖို့ လိုအပ်တယ်လို့ ရီးရဲလ်နည်းပြအန်စလော့တီက ပြောပါတယ်။ 

ရီးရဲလ်အသင်းဟာ ဒီကနေ့ညတနာရီခွဲ မန်စီးတီးရဲ့ အိမ်ကွင်း အီတီဟတ်မှာ လာရောက်ကစားရမှာပါ။ 

ပွဲမတိုင်ခင် သတင်းစာရှင်းလင်းပွဲမှာတော့ မန်စီးတီးက ဘောလုံးပိုင်ဆိုင်မှုအသာနဲ့ ကစားနေချိန်မှာ ခံစစ်ကျစ်လစ်နေဖို့ လိုအပ်ပြီး အဲဒီလို မလုပ်နိုင်ရင် ရှုံးပွဲတွေ့သွားလိမ့်မယ်လို့ ကစားသမားတွေကို တိုက်တွန်းပြောသွားပါတယ်။ 

“ကျစ်လစ်မှု မရှိရင်တော့ ခံစားသွားရလိမ့်မယ်။ သူတို့ဘောလုံးကိုင်ထားချိန်မှာ ခံစစ်ကောင်းကောင်း ကစားနိုင်ဖို့ လိုသလို ကျနော်တို့ ဘောလုံးရရှိနေချိန်မှာလည်း ရှိသမျှ စွမ်းဆောင်ရည်အကုန်ထုတ်ပြီး ကစားနိုင်ဖို့လိုအပ်တယ်” လို့ နည်းပြ အန်စလော့တီက ပြောပါတယ်။ 

မန်စီးတီးနဲ့ ကစားမယ့် ရီးရဲလ်မက်ဒရစ်အသင်းမှာ ကတ်စမဲရိုးနဲ့ အလာဘာတို့ ပါဝင်ဖို့ မသေချာဘဲ၊ တခြားနောက်ခံလူ ဖာနန်ဒက်စ်ကလည်း ကြံ့ခိုင်မှုမပြည့်ဝသေးပါဘူး။ မန်စီးတီးမှာတော့ ကန်ဆယ်လို ပွဲပယ်ထိထားသလို ဂျွန်စတုန်းစ်လည်း ဒဏ်ရာကြောင့်လွဲချော်မှာဖြစ်ပါတယ်။