မတ်လတုန်းက ကိုဗစ်-၁၉ ကပ်ရောဂါ အပြင်းအထန် ကူးစက်ခဲ့တဲ့ တရုတ်ရဲ့ စီးပွားရေးမြို့တော် ရှန်ဟိုင်းမှာ လုပ်ငန်းပြန်စဖို့ ပထမအသုတ်ထဲ  ထိုင်ဝမ်ကုမ္ပဏီ ၁၁ ခုကို နာမည်ကောင်းစာရင်းထဲမှာ ထည့်သွင်းထားကြောင်း ထိုင်ဝမ်ရေးရာ နိုင်ငံတော်ကောင်စီရုံးရဲ့ ပြောရေးဆိုခွင့်ရှိသူ မာရှောင်းဂွမ်က ဧပြီ ၂၇ ရက်မှာ ကြေညာလိုက်ပါတယ်။

ရှန်ဟိုင်းနဲ့ စူးကျိုး၊ ခွန်းရှန်းမြို့တွေမှာ စီးပွားရေးလုပ်ငန်း ပြန်စမယ့် ထိုင်ဝမ်ကုမ္ပဏီတွေရဲ့ နောက်ဆုံးရ အခြေအနေတွေကို မာက မီဒီယာကို ရှင်းပြခဲ့တာပါ။

လုပ်ငန်းပြန်စဖို့ စက်မှုနဲ့ သတင်းအချက်အလက် နယ်ပယ်က အဓိကလုပ်ငန်း ၆၆၆ ခုရဲ့ နာမည်ကောင်းစာရင်းကို ပြုစုပြီးပြီလို့ စက်မှုနဲ့ သတင်းအချက်အလက် နည်းပညာ ဝန်ကြီးဌာနက ဧပြီ ၁၅ ရက်မှာ ပြောခဲ့ပါတယ်။

ဝန်ကြီးဌာနရဲ့ ညွှန်ကြားချက်နဲ့အညီ ရှန်ဟိုင်း စီးပွားရေးနဲ့ သတင်းအချက်အလက် နည်းပညာကော်မရှင်က လုပ်ငန်းတွေအတွက် ထုတ်လုပ်မှု ပြန်စဖို့နဲ့ မြို့တော်အတွင်း ကိုဗစ်-၁၉ ကာကွယ်ထိန်းချုပ်ရေး အစီအမံတွေကို ဆက်ထိန်းထားဖို့ လမ်းညွှန်ချက်ကိုလည်း ထုတ်ပြန်ခဲ့ပါတယ်။