ဘိုင်ယန်မြူးနစ်တိုက်စစ်မှူး လီဝန်ဒေါစကီးဟာ ဘာစီလိုနာအသင်းဆီ ပြောင်းရွှေ့ဖို့ အကြိုသဘောတူညီမှု ရရှိထားတယ်လို့ သိရပါတယ်။ 

သူဟာ ဘိုင်ယန်နဲ့ ၂၀၂၃ ခုနှစ်အထိ စာချုပ်သက်တမ်း ကျန်ရှိသေးပေမယ့် စာချုပ်သက်တမ်းတိုးဖို့ စိတ်ကူးမရှိဘူးလို့ အသင်းကိုအသိပေးထားကြောင်း ဘိုင်ယန်မြူးနစ် ဘောလုံးဒါရိုက်တာ ဟတ်ဆန်က အတည်ပြုခဲ့ပါတယ်။ 

“စာချုပ်သစ်ကိစ္စအပေါ် လီဝန်ကို ပြောခဲ့ချိန်မှာ သူက ကျနော်တို့ရဲ့ ကမ်းလှမ်းချက်ကို လက်မခံချင်ခဲ့ဘဲ အသင်းကနေ ထွက်ခွာလိုနေတယ်။ သူ့ရဲ့ စာချုပ်က ၂၀၂၃ ခုနှစ် ဇွန်လအထိ ရှိတာမှန်ပါတယ်။ ဒီလိုမျိုးနဲ့သာဆိုရင် ကျနော်တို့ဘက်ကလည်း သက်တမ်းတိုးဖြစ်မှာ မဟုတ်ဘူးဆိုတာ ရှင်းလင်းပါတယ်” လို့ ဘိုင်ယန်ဘောလုံးဒါရိုက်တာ ဟတ်ဆန်က စကိုင်းစပေါ့ရုပ်သံနဲ့ တွေ့ဆုံစဉ်မှာ ပြောပါတယ်။ 

The Times သတင်းစာကတော့  လီဝန်ဒေါစကီးရဲ့ အေးဂျင့်ဟာ ဘာစီလိုနာအသင်းနဲ့ ၃ နှစ်စာချုပ်ဖို့ နူတ်အားဖြင့် သဘောတူညီမှု ရယူထားပြီး ပေါင် ၂၅ သန်းကနေ ၃၅ သန်းဝန်ကျင်နဲ့ ပြောင်းရွှေ့ဖို့ရှိနေတယ်လို့ သိရပါတယ်။ 

ပိုလန်တိုက်စစ်မှူးဟာ ၂၀၁၄ ခုနှစ်က ဒေါ့မွန်ကနေ ပြောင်းရွှေ့လာခဲ့ပြီးနောက် ၈ ရာသီ ကာလအတွင်း စုစုပေါင်း ၃၇၄ ပွဲမှာ ၃၄၃ ဂိုးအထိ သွင်းယူနိုင်ခဲ့ပါတယ်။ 

ဘိုင်ယန်အမှုဆောင်အရာရှိချုပ် အိုလီဗာခမ်းကတော့ တရာသီကို ဂိုး ၃ဝ ကနေ ၄ဝ ကြား သွင်းနိုင်တဲ့ တိုက်စစ်မှူးတဦးကိုရောင်းချမယ်ဆိုရင် မိုက်မဲရာကျလိမ့်မယ်လို့ မှတ်ချက်ပေးခဲ့ပြီး တက်နိုင်သမျှ ညှိနှိုင်းသွားဖို့ ပြင်ဆင်နေပါတယ်။