ဂျာမနီနိုင်ငံမှာ မျောက်ကျောက်ရောဂါဖြစ်ပွားမှု ပိုပြင်းထန်လာရင် ရောဂါပိုးရှိသူနဲ့ ထိတွေ့မိသူတွေကို ကာကွယ်ဆေးထိုးဖို့အတွက် ဘာဗာရီးယန်း နော်ဒစ် ကာကွယ်ဆေးပေါင်း ၄၀,၀၀၀ ကို အဆင်သင့်ဖြစ်နေဖို့ ဂျာမန်အစိုးရက ညွှန်ကြားထားပါတယ်။

ဒါပေမဲ့ တာဝန်ရှိသူတွေဟာ အခုချိန်ထိ တခြားကြိုတင်ကာကွယ်မှု အစီအမံတွေကို လုပ်ဆောင်နေပါတယ်။

ဂျာမန်ကျန်းမာရေးဝန်ကြီး ကားလ် လောက်တာဘာ့ခ်ကတော့ မေ ၂၄ ရက် သတင်းစာရှင်းလင်းပွဲမှာ ရောဂါပိုးရှိသူအတွက် အကြံပြုထားတဲ့ အနည်းဆုံး ၂၁ ရက်တာကာလ သီးသန့်ခွဲထားဖို့ စသဖြင့် အစီအမံတွေဟာ အခုချိန်မှာ ရောဂါဖြစ်ပွားမှုကို ထိန်းချုပ်ဖို့ လုံလောက်ကြောင်း ပြောပါတယ်။

မျောက်ကျောက်ရောဂါဖြစ်ပွားမှုကို ထိန်းထားနိုင်ပြီး ကပ်ရောဂါအသစ်တခု အစပြုနေပြီ ဆိုပြီး အချက်ပြခြင်းမျိုးလည်း မရှိကြောင်းနဲ့ အစောပိုင်း ကြိုတင်ကာကွယ် ဆောင်ရွက်ထားတာဟာ လူမှုအသိုင်းအဝိုင်းတွေထဲကို ရောက်လာနိုင်တဲ့ ရောဂါပိုးမွှားတွေကို ဟန့်တားပေးနိုင်တယ်လို့လည်း သူက ဆိုပါတယ်။

အခုချိန်ထိတော့ ဂျာမနီမှာ မျောက်ကျောက်ရောဂါ ကူးစက်ခံရသူ ငါးဦးကို စာရင်းသွင်းထားပြီး အားလုံးဟာ အမျိုးသားတွေဖြစ်ကြောင်း ဂျာမနီနိုင်ငံရဲ့ ကူးစက်ရောဂါဆိုင်ရာ ရောဘတ်ကို့ခ်ျ အင်စတီကျုမှ အကြီးအကဲ လိုသာ ဗီးလာက သတင်းစာရှင်းလင်းပွဲမှာ ပြောဆိုခဲ့ပါတယ်။

ကမ္ဘာ့ကျန်းမာရေးအဖွဲ့ တာဝန်ရှိသူတဦးကလည်း မေ ၂၃ ရက်မှာ အလားတူ လမ်းညွှန်ချက်ကို ထုတ်ပြန်ခဲ့ပြီး ဒီရောဂါဖြစ်ပွားမှုဟာ တကိုယ်ရေသန့်ရှင်းမှုနဲ့ ဘေးကင်းစိတ်ချရတဲ့ လိင်ပိုင်းဆိုင်ရာ အပြုအမူတွေလို အစီအမံတွေက ကူးစက်ပျံ့နှံ့မှုကို ထိန်းချုပ်ဖို့ ကူညီပေးမှာ ဖြစ်တာကြောင့် လူအစုလိုက်အပြုံလိုက် ကာကွယ်ဆေးထိုးဖို့ မလိုအပ်ကြောင်း ပြောထားပါတယ်။

ကမ္ဘာ့ကျန်းမာရေးအဖွဲ့ (WHO) ကတော့ အနောက်အာဖရိကနဲ့ အလယ်ပိုင်းဒေသတွေမှာ အစုလိုက် ဖြစ်ပွားတတ်လေ့ရှိတဲ့ ရောဂါအတွက် ပုံမှန်မဟုတ်တဲ့ ရေမြေပထဝီအလိုက် ပျံ့နှံ့မှုနဲ့အတူ မျောက်ကျောက်ရောဂါ ကူးစက်သူနဲ့ သံသယရှိလူနာ ၂၅၀ ကျော်ကို မှတ်ပုံတင်ထားပါတယ်။ ဒါပေမဲ့ တခြားနေရာတွေမှာ ဖြစ်ပွားမှုတွေ့ရှိတာ ရှားပါတယ်။

အထူးသဖြင့် လိင်ပိုင်းဆိုင်ရာ ကူးစက်မှုကို ပစ်မှတ်ထား စောင့်ကြည့်ရာမှာလည်း အမျိုးသားချင်း လိင်ဆက်ဆံတတ်တဲ့ အမျိုးသားတွေမှာ ရောဂါဖြစ်ပွားမှု အများအပြား ရှိပေမဲ့လည်း အားလုံးတော့ မဟုတ်ကြောင်း WHO က ပြောထားပါတယ်။