အမေရိကန်ပြည်ထောင်စု၊ အိုကလာဟိုးမားပြည်နယ်၊ တူလ်ဆာမြို့ရှိ ဆေးဘက်ဆိုင်ရာ အဆောက်အအုံတလုံးမှာ  ဇွန် ၁ ရက်က ရိုင်ဖယ်သေနတ် ကိုင်ဆောင်ထားတဲ့ အမျိုးသားတယောက်ရဲ့ ပစ်ခတ်မှုကြောင့် လူ ၄ ယောက်  သေဆုံးခဲ့တယ်လို့ ရဲတပ်ဖွဲ့က ပြောပါတယ်။

“အခုလောလောဆယ် အရပ်သား ၄ ယောက် သေဆုံးခဲ့ပါတယ်” လို့ တူလ်ဆာ ဒုတိယရဲချုပ် အဲရစ် ဒယ်လ်ဂလေ့ရှ်က ပြောကြားခဲ့ပါတယ်။

သေဆုံးတဲ့အထဲ သေနတ်သမား တယောက်လည်း  ပါဝင်ပြီး သူ့ကိုယ်သူ ပြန်ပစ်ထားပုံရတယ်လို့ ဆိုပါတယ်။

အရာရှိတွေဟာ စိန့်ဖရန်စစ်ဆေးရုံဝင်းကို ရှင်းလင်းဖို့ လုပ်ဆောင်နေဆဲဖြစ်ပြီး သတင်းစာရှင်းလင်းပွဲ ကျင်းပဖို့လည်း စီစဉ်ထားပါတယ်။

သမ္မတ ဂျိုးဘိုင်ဒင်ဟာ ပစ်ခတ်မှုနဲ့ပတ်သက်တဲ့ အခြေအနေကို အနီးကပ် စောင့်ကြည့်နေပြီး ပံ့ပိုးကူညီပေးဖို့ ပြည်နယ်နဲ့ ဒေသဆိုင်ရာ တာဝန်ရှိသူတွေကို ဆက်သွယ်ထားပါတယ်လို့ အိမ်ဖြူတော်က ပြောကြားခဲ့ပါတယ်။

ဒါဟာ အမေရိကန်ပြည်ထောင်စုမှာ အစုလိုက်အပြုံလိုက် ပစ်ခတ်မှု ဆက်တိုက် ဖြစ်ပွားခဲ့တဲ့အထဲက နောက်ဆုံးဖြစ်ရပ်တခုလည်း ဖြစ်ပါတယ်။

အမေရိကန်မှာ မေလအတွင်းက အစုလိုက်အပြုံလိုက် ပစ်ခတ်မှု နှစ်ကြိမ်ဖြစ်ပွားပြီးနောက် အမေရိကန်ပြည်သူတွေ တုန်လှုပ်သွားခဲ့ရပြီး သေနတ်ထိန်းချုပ်မှုနဲ့ ပတ်သက်လို့ အချေအတင် ဆွေးနွေးမှုတွေ ဖြစ်ပွားပြီးနောက် တူလ်ဆာပစ်ခတ်မှု ထပ်ဖြစ်ပွားခဲ့တာပါ။

ပြီးခဲ့တဲ့ သီတင်းပတ်က တက္ကဆက်ပြည်နယ် ယူဗဲဒီမြို့ရှိ မူလတန်းကျောင်းတကျောင်းမှာ ကလေး ၁၉ ယောက်နဲ့  ဆရာ  နှစ်ယောက်ကို  သေနတ်သမားက သတ်ဖြတ်ခဲ့ပါတယ်။

မေလအစောပိုင်းက နယူးယောက်၊ ဘတ်ဖလိုရှိ စူပါမားကတ်တခုမှာ သေနတ်သမားတယောက်ကြောင့် လူ ၁၀ ယောက် သေဆုံးခဲ့ရပါတယ်။