ယူကရိန်းနိုင်ငံအလယ်ပိုင်းရှိ လူစည်ကားတဲ့ ကုန်တိုက်တခုမှာ လူပေါင်း ၁၈ ဦးထက်မနည်း သေဆုံးခဲ့ရတဲ့ ရုရှား ဒုံးကျည်ပစ်ခတ်တိုက်ခိုက်မှုကို “စစ်ရာဇဝတ်မှု” လို့ ကမ္ဘာ့ထိပ်သီး ၇ နိုင်ငံက ခေါင်းဆောင်တွေရဲ့ ဂျီဆဲဗင်း ထိပ်သီးအစည်းအဝေးကနေ တံဆိပ်ကပ် ရှုတ်ချခေါ်ဝေါ်လိုက်ပြီး မော်စကိုအပေါ် ပိတ်ဆို့အရေးယူမှုတွေ တိုးမြှင့်ဖို့ ဆွေးနွေးနေပါတယ်။

ဇွန် ၂၇ ရက်က ကရီမန်ချတ်မြို့ စျေးဝယ်စင်တာရဲ့ လူအစည်ဆုံးအချိန်မှာ တိုက်ခိုက်လိုက်တဲ့ လုပ်ရပ်အတွက် ရုရှားသမ္မတ ဗလာဒီမာပူတင်နဲ့ တာဝန်ရှိသူတွေကို အရေးယူဖို့ ခေါင်းဆောင်တွေက ကတိပြုခဲ့ကြပါတယ်။

အပြစ်မဲ့ အရပ်သားတွေကို မခွဲခြားတဲ့ တိုက်ခိုက်မှုဟာ စစ်ရာဇဝတ်မှုဖြစ်ပြီး ရွံရှာဖွယ်ကောင်းတဲ့ တိုက်ခိုက်မှုကို ရှုတ်ချကြောင်း ထုတ်ပြန်ချက်မှာ ဖော်ပြထားပါတယ်။

ရုရှားဟာ အရပ်သားတွေကို တမင်ရည်ရွယ်ပြီး ပစ်မှတ်ထားကြောင်း ယူကရိန်းက စွပ်စွဲလိုက်ပြီး ဥရောပသမိုင်းမှာ အပြောင်မြောက်ဆုံး အကြမ်းဖက်လုပ်ရပ်တွေထဲက တခုဖြစ်တယ်လို့ ယူကရိန်းသမ္မတ ဗိုလိုဒီမာ ဇလန်းစကီးက တယ်လီဂရမ်က သူ့ရဲ့ ညနေခင်း ထုတ်လွှင့်မှုမှာ ပြောသွားပါတယ်။

ဗြိတိန်ဝန်ကြီးချုပ် ဘောရစ်ဂျွန်ဆင်က “ကရီမန်ချတ်မြို့ တိုက်ခိုက်မှုဟာ ပူတင်ရဲ့ ရက်စက်ကြမ်းကြုတ်မှုနဲ့ ရိုင်းစိုင်းမှုရဲ့ နက်ရှိုင်းမှုကို ပြသခဲ့တယ်” လို့ ပြောကြားခဲ့ပါတယ်။ အမေရိကန် နိုင်ငံခြားရေးဝန်ကြီး အန်တိုနီဘလင်ကန်က “တကမ္ဘာလုံး တုန်လှုပ်ချောက်ချားသွားရတယ်” လို့ ပြောပါတယ်။

ကုလသမဂ္ဂ အကြီးအကဲ အန်တိုနီယို ဂူတာရက်စ်ရဲ့ ရုံးခန်းကတော့ ဒီတိုက်ခိုက်မှုဟာ လုံးဝကို စိတ်မကောင်းစရာဖြစ်ကြောင်း ရှုတ်ချခဲ့ပါတယ်။

ပြင်သစ်သမ္မတ အီမန်နျူယယ် မက်ခွန်းကတော့ ဒီတိုက်ခိုက်မှုကို စက်ဆုပ်ရွံရှာဖွယ်အဖြစ် ရှုတ်ချလိုက်ပါတယ်။

ရုရှားက ဗီတိုအာဏာကိုင်စွဲထားတဲ့ ကုလသမဂ္ဂ လုံခြုံရေးကောင်စီမှာ တိုက်ခိုက်မှုတွေနဲ့ ပတ်သက်ပြီး ဇွန် ၂၈ ရက်က တွေ့ဆုံဖို့ ယူကရိန်းက တောင်းဆိုထားပေမဲ့လည်း ကျူးကျော်မှုနဲ့ ပတ်သက်တဲ့ ဝေဖန်ဆွေးနွေးမှုတွေကို တားဆီးနိုင်ခြင်းမရှိကြောင်း သံတမန်တွေက ပြောပါတယ်။ 

G7 ထိပ်သီးအစည်းအဝေး ဒုတိယနေ့က ထုတ်ပြန်ချက်ထဲမှာတော့ “ကျွန်ုပ်တို့ဟာ ငွေကြေး၊ လူသားချင်းစာနာမှု၊ စစ်ရေးနဲ့ သံတမန်ရေးရာ အထောက်အပံ့တွေကို ဆက်လက်ပံ့ပိုးပေးသွားမှာဖြစ်ပြီး ယူကရိန်းနဲ့အတူ အချိန်ကြာကြာ ရပ်တည်သွားမှာ ဖြစ်ကြောင်း” ဖော်ပြထားပါတယ်။

ဇွန် ၂၆ ရက်ကတော့ G7 ဟာ ရုရှားရွှေတင်သွင်းမှုကို ရပ်တန့်ဖို့ အစီအစဉ်ရှိကြောင်း ကြေညာခဲ့ပါတယ်။