စစ်ကိုင်းတိုင်း၊ အင်းတော်မြို့နယ်မှာ စစ်ကောင်စီတပ်ဖွဲ့တွေက အဓမ္မပေါ်တာဆွဲလာတဲ့ ပြည်သူ ၁၅ ယောက်ကို  စစ်ဝတ်စုံတွေ ဝတ်ပေးထားပြီး စစ်ကြောင်းထိုးလာတယ်လို့   ခိုင်လုံတဲ့ ဒေသခံ သတင်းရင်းမြစ်က ပြောပါတယ်။

ဇူလိုင် ၁၂ ရက်‌ မနက်က ကသာမြို့နယ် ရာဇဂြိုလ်တောင်ကနေ အင်းတော်နယ်ဘက်ကို အင်အား ၁၀၀ ဝန်းကျင်ပါတဲ့ စစ်ကောင်စီတပ်စစ်ကြောင်း ဆင်းလာရာ လမ်းတလျှောက်ရှိ ကူးဆိပ်၊ ကျန်တော၊ နားနောင်၊ ကျော်ရွာနဲ့ နားခါရွာတွေရှိ  နွားကျောင်းနေသူနဲ့ လယ်ယာလုပ်ကိုင်နေတဲ့ ပြည်သူ ၁၅ ယောက်ကို  ပေါ်တာဆွဲသွားတာဖြစ်ပါတယ်။

မြင်တွေ့လိုက်ရသူ‌ ဒေသခံတစ်ဦးက" စစ်ဝတ်စုံဝတ်ပေးခံထားရတဲ့သူတွေ ငိုယိုနေကြတယ်"လို့ ပြောပါတယ်။

စစ်ကိုင်းတိုင်းအတွင်း စစ်ကြောင်းထိုးပြီး ကျေးရွာတွေကို ဝင်ရောက် မီးရှို့ ပြည်သူတွေကို ဖမ်ဆီး သတ်ဖြတ်နေတဲ့ စစ်ကောင်စီတပ်တွေဟာ အရပ်သားတွေကို ပေါ်တာအဖြစ် ဖမ်းဆီးပြီး အဓမ္မ အလုပ်ခိုင်းစေတာနဲ့  လူသားဒိုင်းအဖြစ် အသုံးပြုတာတွေရှိနေတာပါ။   

စစ်ကောင်စီတပ်သားတွေဟာ  နန်းကင်ရွာမှာ တထောက်နားပြီး အင်းတော်မြို့ရဲ့တောင်ဘက် နတ်မဟုတ်ကြီး၊ တန်ဘိုနဲ့ မဲဇာရွာဘက်ကို ဦးတည်ပြီး လယ်ပြင်လမ်းအတိုင်း ဆက်လက်ချီတက်သွားကြတယ်လို့လည်း ဒေသခံတွေကပြောဆိုကြပါတယ်။