ရော်နယ်ဒိုကို မန်ယူနည်းပြနှင့် အသင်းဖော်တွေကပါ အလိုရှိမည်မထင်ဟု ကာရေဂါပြော

စီရော်နယ်ဒိုကို မန်ယူအသင်းနည်းပြနဲ့ အသင်းဖော်တွေကပါ အလိုရှိလိမ့်မယ်လို့ မထင်ကြောင်း အင်္ဂလန်နောက်ခံလူဟောင်း ကာရေဂါက ပြောသွားပါတယ်။
SkyBet ရုပ်သံနဲ့ ချိတ်ဆက်ထားတဲ့ The Overlap Youtube အစီအစဉ်မှာ ဂယ်ရီနဗီးလ်နဲ့အတူ ကာရေဂါက တင်ဆက်ခဲ့ပြီး စီရော်နယ်ဒိုရဲ့ အခြေအနေနဲ့ ပတ်သက်ပြီး သုံးသပ်ခဲ့ကြတာပါ။
ရော်နယ်ဒိုကိုခေါ်ယူဖို့ ဥရောပက ဘယ်ကလပ်အသင်းကမှ စိတ်မဝင်စားသလို သူ့အသင်းနည်းပြနဲ့ အသင်းဖော်တွေကတောင် အသင်းမှာ ဆက်ရှိလိုတယ်ဆိုတာ မသေချာကြောင်း ကာရေဂါက ထည့်သွင်းပြောခဲ့တာပါ။
“ရော်နယ်ဒိုဟာ ဒီရာသီမှာ အသက် ၃၇ နှစ်ကနေ ၃၈ နှစ် ပြည့်တော့မှာပါ။ သူက အရင်ကလို မဟုတ်တော့ပါဘူး။ ခမ်းနားတဲ့ဂိုးတွေ ရနေဆဲဆိုပေမဲ့ အရင်နဲ့ မတူညီတော့ပါဘူး။ လက်ရှိအချိန်မှာ ဥရောပက ဘယ်အသင်းကမှလည်း သူ့ကို မလိုချင်ကြတော့ပါဘူး။ ကျနော် မှားကောင်းမှားနိုင်ပါတယ်။ နည်းပြတန်ဟတ်ဂ်ကို မေးကြည့်ရင်လည်း သူ့ကို လိုချင်မယ်မထင်ဘူး။ ပြီးတော့ လက်ရှိအချိန်မှာ အသင်းရဲ့ အဝတ်လဲခန်းထဲက ကစားသမားတွေဟာလည်း ရော်နယ်ဒိုကို လိုချင်နေမယ်လို့ ကျနော်မထင်ပါဘူး” လို့ ကာရေဂါက ပြောပါတယ်။
မန်ယူဂန္ထဝင်နောက်ခံလူ ဂယ်ရီနဗီးလ်ကတော့ ရော်နယ်ဒိုကို ရောင်းချလိုက်တာက မန်ယူအတွက် တခုတည်းသော ရွေးချယ်မှုဖြစ်ကြောင်း သုံးသပ်သွားပါတယ်။