အိန္ဒိယတွင် ဆီတင်ကားနှင့်တိုက်မိပြီး ဘတ်စ်ကားမီးလောင်၊ ၁၂ ဦး သေဆုံးပြီး ၃၀ ကျော်ဒဏ်ရာရ
အိန္ဒိယနိုင်ငံ အနောက်ပိုင်း မဟာရတ်ရှ်ထျာ ပြည်နယ်မှာ အောက်တိုဘာ ၈ ရက်က ဘတ်စ်ကားတစီး မီးလောင်ခဲ့ပြီး လူ ၁၂ ဦးထက်မနည်း သေဆုံး၊ ၂ ဦးက စိုးရိမ်ရတဲ့ အခြေအနေမှာ ရှိနေတယ်လို့ ရဲအရာရှိတစ်ဦးက ရိုက်တာသတင်းဌာနကို ပြောပါတယ်။
ဒဏ်ရာရရှိသူ ၃၀ ကျော်ကို ဒေသဆိုင်ရာမြို့ပြဆေးရုံမှာ ကုသပေးထားပါတယ်။ ဘတ်စ်ကားက ဒီဇယ်ဆီတင်ကားတစီးကို ဝင်တိုက်ပြီးတဲ့နောက် မီးလောင်ခဲ့တာလို့ မျက်မြင်သက်သေတစ်ဦးက ANI သတင်းဌာနကို ပြောခဲ့ပါတယ်။
နာရှစ်ခ် မြို့က ဘတ်စ်ကားဖြစ်ရပ်ဆိုးကြောင့် ဝမ်းနည်းကြေကွဲရပါတယ်လို့ ၀န်ကြီးချုပ် နရင်ဒြာ မိုဒီက တွစ်တာမှာ ပြောကြားခဲ့ပြီး သေဆုံးသူတွေရဲ့ မိသားစုတွေအား တဦးကို ရူပီး ၂၀၀,၀၀၀ (ဒေါ်လာ ၂,၄၀၀) နဲ့ ဒဏ်ရာရသူ တဦးကို ၅၀၀၀၀ ရူပီး ပေးမယ်လို့ ပြောပါတယ်။
"ဒဏ်ရာရသူတွေကို အမြန်ဆုံး ပြန်ကောင်းလာပါစေ။ ဒေသဆိုင်ရာ အုပ်ချုပ်ရေးက ထိခိုက်သူတွေကို ဖြစ်နိုင်သမျှ အကူအညီတွေ ပေးနေပါတယ်" လို့ မိုဒီက ဆိုပါတယ်။
