မကွေးတိုင်း၊ ပခုက္ကူမြို့နယ် ရွှေချောင်းကျေးရွာရှိ ငါးဒိုင်လုပ်ငန်းနဲ့ ပစ္စည်းအပေါင်ခံတဲ့ နေအိမ်ကို အောက်တိုဘာ ၁၂ ရက် ညနေ ၅ နာရီကျော်လောက်မှာ လက်နက်ကိုင် ၅ ယောက်လောက်က သေနတ်တွေနဲ့ချိန်ပြီး ဓားပြတိုက်သွားတယ်လို့ မြို့ခံတွေဆီကနေ သိရပါတယ်။

ရွှေချောင်းရွာရှိ ဦးထိန်လင်း၊ ဒေါ်တင်တင်ဝင်းတို့နေအိမ်ကို ဓားပြတိုက်သွားတာဖြစ်ပြီး ငွေကျပ် ၂၅ သိန်းနဲ့ ရွှေထည်ပစ္စည်းတွေပါသွားကာ စုစုပေါင်းတန်ဖိုးကိုတော့ အတိအကျ မသိရသေးပါဘူး။

အဲဒီ ဓားပြတိုက်တဲ့သူတွေဟာ ဘယ်သူတွေဆိုတာကို မသိရသေးဘဲ ညနေ ၆ နာရီလောက်မှာ စစ်ကောင်စီဘက်က ရဲတွေ ရောက်လာပြီး စစ်ဆေးမေးမြန်းကာ စီစီတီဗွီ မှတ်တမ်းတွေကိုလည်း ယူသွားကြတယ်လို့ ဒေသခံတယောက်က ပြောပါတယ်။

ပခုက္ကူမြို့မှာ လုယက်၊ အနုကြမ်းစီးမှုတွေဟာ ညပိုင်းတွေမှာသာမက နေ့ခင်းဘက်တွေမှာကို လမ်းမကြီးပေါ်တွေမှာ ဖြစ်ပွားနေတာပါ။ အမျိုးသမီးတွေဆိုရင် တန်ဖိုးကြီး လက်ဝတ်ရတနာတွေနဲ့ ဆိုင်ကယ်အကောင်းစားတွေစီးပြီး လမ်းပေါ်ကို တယောက်တည်း ထွက်ရင် အချိန်မရွေး အန္တရာယ်ကျရောက်နိုင်တယ်လို့ မြိုခံတွေက ဆိုပါတယ်။

ပခုက္ကူမြို့မှာ ဇူလိုင် ၄ ရက် မနက်ပိုင်းကလည်းက မြို့မစျေးရှိ ရှမ်းဧကရီရွှေဆိုင် ဓားပြအတိုက်ခံရလို့ ရွှေထည်ပစ္စည်းတွေနဲ့ ငွေကြေးတွေ ဆုံးရှုံးခဲ့သလို ဇူလိုင် ၅ ရက် နေ့လယ်ပိုင်းကလည်း အထည်ချုပ်စက်ရုံလုပ်သားတွေအတွက် လစာငွေ သိန်း ၂,၀၀၀ ကျော်နဲ့ ကားတစီးကို ဓားပြတိုက်သွားခဲ့ပါတယ်။