ကိုလံဘီယာနိုင်ငံ မြို့တော်ဘိုဂိုတာမှာ အောက်တိုဘာ ၁၉ ရက်က ရဲတွေနဲ့ အမ်ဘဲရာ အသိုက်အဝန်းက ဌာနေတိုင်းရင်းသားတွေကြား ရုန်းရင်းဆန်ခတ်ဖြစ်ခဲ့ပြီး အမျိုးသားတယောက် ဒဏ်ရာရခဲ့ပါတယ်။

မျက်မြင်သက်သေတယောက်ရဲ့ ဗွီဒီယိုဖိုင်မှာတော့ မျက်နှာသွေးစွန်းနေတဲ့ အမျိုးသားတယောက်ကို လုံထိန်းရဲတွေက မြေကြီးပေါ်ကနေ ဆွဲထူဖို့ လုပ်နေတာကို ပြထားပါတယ်။

ဒီလူ ဒဏ်ရာဘယ်လိုရလာတယ်၊ ဒဏ်ရာဘယ်လောက်ပြင်းထန်တယ် ဆိုတာတော့ မရှင်းလင်းသေးပါဘူး။

ပနားမားနဲ့ ကိုလံဘီယာက ဌာနေတိုင်းရင်းသားတွေဖြစ်တဲ့ အမ်ဘဲရာ အသိုင်းအဝိုင်းဟာ ကိုလံဘီယာနိုင်ငံက လက်နက်ကိုင် ပဋိပက္ခတွေကြောင့် အိုးအိမ်စွန့်ခွာ ထွက်ပြေးခဲ့ကြရတာဖြစ်ပြီး ဗုဒ္ဓဟူးနေ့က ဘိုဂိုတာမြို့လယ်မှာ ဆန္ဒပြခဲ့ကြတာပါ။

သူတို့ဟာ သူတို့ရဲ့အခက်အခဲတွေကို အာရုံစိုက်မှုနဲ့ သူတို့ရဲ့ နေရေးထိုင်ရေး အခြေအနေကို မြှင့်တင်ပေးဖို့ တောင်းဆိုခဲ့ကြပါတယ်။

ဒေသဆိုင်ရာ အာဏာပိုင်တွေရဲ့ အဆိုအရ အဲဒီရုန်းရင်းဆန်ခတ်မှုမှာ ရဲအရာရှိ ၁၁ ယောက် အပါအဝင် အနည်းဆုံး လူ ၂၄ ယောက် ဒဏ်ရာရရှိခဲ့ကြောင်း သိရပါတယ်။