အစ္စရေးနိုင်ငံဟာ ယူကရိန်းကို အရပ်သားတွေအတွက် လေကြောင်းတိုက်ခိုက်မှု သတိပေးစနစ်တွေ ကူညီပေးမယ်လို့ အောက်တိုဘာ ၁၉ ရက်မှာ ကမ်းလှမ်းခဲ့ပါတယ်။

အစ္စရေးနိုင်ငံမှာ သူ့ရဲ့ဒေသတွင်းနိုင်ငံတွေရဲ့ တိုက်ခိုက်မှုကို တားဆီးဖို့ တီထွင်ထားတဲ့ ရေဒါကွန်ရက်ရှိပြီးတော့ အဲဒီစနစ်ဟာ ဒုံးကျည်တွေပစ်လွှတ်လာတဲ့အခါ အကာအကွယ်ယူကြဖို့ နိုင်ငံသားတွေကို သတိပေးတဲ့ ဆိုင်ရန် အချက်ပေးဥဩ သို့မဟုတ် ဆဲလ်ဖုန်းသတိပေးချက်တွေ လုပ်ဆောင်ပေးပါတယ်။

အလားတူ ကြိုတင်သတိပေးနည်းပညာတွေကို ယူကရိန်းဆီ ကမ်းလှမ်းပေးနိုင်ကြောင်းလည်း အစ္စရေးကာကွယ်ရေးဝန်ကြီးဌာန ပြောရေးဆိုခွင့်ရှိသူက ပြောပါတယ်။

အီရန်လုပ် ဟီဆာရှာဟဒ်-၁၃၆ ကာမိကာဇီ ဒရုန်းတွေသုံးပြီး ရုရှားရဲ့တိုက်ခိုက်မှု အများအပြားကို အစီရင်ခံပြီးနောက်မှာ အောက်တိုဘာ ၁၈ ရက်က ယူကရိန်းဟာ အစ္စရေးကို အကူအညီ တိုးမြှင့်တောင်းခံခဲ့ပါတယ်။

ယူကရိန်းသံအမတ်ကြီးက ဒရုန်းတွေကိုပစ်ချမယ့်အစား စနစ်တွေကို တောင်းဆိုလိုက်တာဖြစ်ပြီး အစ္စရေး ကာကွယ်ရေးဝန်ကြီး ဘန်နီ ဂန့်ဇ်က အစ္စရေးဟာ ကိယက်ဗ်ကို လက်နက်မထောက်ပံ့ရေး ကိစ္စက ခိုင်မာကြောင်း ပြောဆိုပါတယ်။

အစ္စရေးဟာ လေကြောင်းရန်ကာကွယ်ရေး သတိပေးချက်တွေအတွက် သူတို့ရဲ့ လိုအပ်ချက်တွေကို သတင်းအချက်အလက် မျှဝေပေးဖို့ ယူကရိန်းကို တောင်းဆိုထားတယ်လို့ ဂန့်ဇ်က အီးယူသံတမန်တွေကို ပြောကြားခဲ့ကြောင်း သူ့ရဲ့ရုံးထုတ်ပြန်ချက်အရ သိရပါတယ်။

ဒါမှသာ အစ္စရေးက အရပ်သားတွေရဲ့ အသက်ကယ်တင်ခြင်းဆိုင်ရာ ကြိုတင်သတိပေးစနစ် တိုးတက်ရေးမှာ အထောက်အကူ ပြုနိုင်မယ်လို့ ဆိုပါတယ်။

အစ္စရေးဟာ ရုရှားရဲ့ကျူးကျော်မှုကို ရှုတ်ချပေမဲ့ ယူကရိန်းအကူအညီကိုတော့ လူသားချင်းစာနာမှုဆိုင်ရာ ကယ်ဆယ်ရေးဆိုပြီး ကန့်သတ်ထားပါတယ်။

ရုရှားနိုင်ငံကို ဒရုန်းတွေ ထောက်ပံ့ပေးထားတယ် ဆိုတာကို အီရန်က ငြင်းဆိုထားပြီး ကရင်မလင်က ဘာမှတ်ချက်မှ မပေးပါဘူး။ အစ္စရေးရှိ ရုရှားသံရုံးကလည်း မှတ်ချက်ပေးဖို့ ငြင်းဆိုခဲ့ပါတယ်။

အီရန်က ရုရှားကို မြေပြင်မှ-မြေပြင်ပစ် ဒုံးကျည်တွေ ထောက်ပံ့ပေးမယ်လို့ ကတိပြုထားကြောင်း အင်္ဂါနေ့က ရိုက်တာသတင်းမှာ ဖော်ပြထားပါတယ်။