ကေအိုင်အေရဲ့ ၆၂ နှစ်မြောက် ဂုဏ်ပြုတေးဂီတဖျော်ဖြေပွဲကို စစ်ကောင်စီက တိုက်လေယာဉ်နဲ့ ဗုံးကြဲတိုက်ခိုက်ခံရပြီး လူပေါင်းများစွာသေကျေဒဏ်ရာရခဲ့တဲ့အပေါ် တုန်လှုပ်ဝမ်းနည်းကြောင်း  UWSA ဝပြည်သွေးစည်းညီညွတ်ရေးပါတီနဲ့နဲ့  NDAA  ရှမ်းပြည်နယ် အရှေ့ပိုင်း အထူးဒေသ ၄  မိုင်းလားတပ်ဖွဲ့တို့က သဘောထားထုတ်ပြန်ပါတယ်။ 

UWSA အနေနဲ့ ဒီဖြစ်စဉ်သတင်းကို ကြားသိရစဉ် များစွာအံ့ဩတုန်လှုပ်ခဲ့ကြောင်းနဲ့ ဒီဖြစ်စဉ်မှာ အသက်ဆုံးရှုံးခဲ့ရတဲ့ အပြစ်မဲ့ပြည်သူတွေအပေါ်နှမြောတမ်းတမှုနဲ့အတူ ကျန်ရစ်သူမိသားစုတွေ၊ ကချင်လွတ်မြောက်ရေးအဖွဲ့ (ကေအိုင်အို)တို့နဲ့ ထပ်တူဝမ်းနည်းကြေကွဲခံစားရတယ်လို့ အောက်တိုဘာ ၂၆ ရက်ထုတ်ပြန်ချက်မှာ ဖော်ပြပါတယ်။ 

UWSA ဟာ ဒီလိုဆိုးဝါးခါးသီးလှတဲ့ဖြစ်စဉ်ရဲ့နောက်ဆက်တွဲ ဖြစ်ပေါ်လာမယ့်အခြေအနေ အရပ်ရပ် ကို အထူးဂရုပြုစောင့်ကြည့်နေကြောင်း၊ ပဋိပက္ခနဲ့သက်ဆိုင်တဲ့သူတွေကိုလည်း အသက်ပေါင်းများစွာ သေကျေပျက်စီးစေတဲ့ထိပ်တိုက်ရင်ဆိုင်တိုက်ပွဲတွေရှောင်ရှားရေး၊ လူ့အဖွဲ့အစည်းနဲ့လူမျိုးစု ကြားချစ်ကြည်ရေး၊ မျိုးရိုးစဉ်ဆက်ရန်ငြိုးနဲ့ ပဋိပက္ခတွေကို ငြိမ်းချမ်းရေးနည်းနဲ့ ကိုင်တွယ်ဖြေရှင်းဖို့ တောင်းဆိုထားပါတယ်။ 

ဒါ့အပြင် လူ့အခွင့်အရေးပဋိညာဉ်စာတမ်းအရအပြစ်မဲ့ပြည်သူတွေ၊ အမျိုးသမီးနဲ့ ကလေးသူငယ်တွေကို ပဋိပက္ခဖြစ်စဉ်တိုက်ခိုက်မှုများကြားမှာ အတတ်နိုင်ဆုံး၊ အထိရောက်ဆုံး ကာကွယ်စောင့်ရှောက်ဖို့လည်း တောင်းဆိုထားပါတယ်။

အလားတူ NDAA မိုင်းလားတပ်ဖွဲ့ရဲ့  ရှမ်းပြည်နယ် အရှေ့ပိုင်း အထူးဒေသ ၄ ငြိမ်းချမ်း ရေးနဲ့ စည်းလုံးရေးကော်မတီကလည်း လေကြောင်းတိုက်ခိုက်မှုကြောင့် လူတွေ သေကျေခဲ့ရတဲ့ ဖြစ်စဉ်နဲ့ ပတ်သက်ပြီး လွန်စွာတုန်လှုပ်မိကြောင်း၊ စစ်ပွဲဒဏ်ကြောင့် ပြည်သူတွေနေရပ်စွန့်ခွါရ ၊ မိသားစုတကွဲတပြားဖြစ်ပြီး အသက်ဆုံးရှုံးရကြောင်း ၊ ဒါကြောင့် တိုင်းရင်းသားပြည်သူတစ်ရပ်လုံး မျှော်လင့်တောင့်တနေတဲ့ ငြိမ်းချမ်းရေးကို ဆောလျင်စွာ ဖော်ဆောင်နိုင်ဖို့ မျှော်လင့်ကြောင်း ရေးသားထုတ်ပြန်ထားပါတယ်။

ဖားကန့်မြို့နယ် အနန့်ပါကျေးရွာမှာ အောက်တိုဘာ ၂၃ ရက်က ကချင်လွတ်မြောက်ရေးအဖွဲ့ KIO ရဲ့ ၆၂ မြောက်ဂုဏ်ပြုတေးဂီတဖျော်ဖြေပွဲကျင်းပနေချိန်  စစ်ကောင်စီတပ်က တိုက်လေယာဉ် ၃ စီးနဲ့ လာရောက်ဗုံးကြဲခဲ့တာကြောင့် KIA တပ်ဖွဲ့ဝင်တွေ၊ ကချင်အနုပညာရှင် ၊ တေးဂီတတီးဝိုင်းအဖွဲ့ဝင်တွေနဲ့ ဖိတ်ကြားထားတဲ့ဧည့်သည်နဲ့ ကချင်အရပ်သားပြည်သူတွေပါ စုစု ပေါင်း  ၆၀ ကျော်သေဆုံးပြီး ၁၀၀ ကျော် ထိခိုက်ဒဏ်ရာရခဲ့ပါတယ်။