သြစတြေးလျနိုင်ငံမြောက်ပိုင်းက လေတပ်စခန်းတခုမှာ အမေရိကန်က နျူးကလီးယားဗုံးတွေ ကြဲချနိုင်စွမ်းရှိတဲ့ B-52 ဗုံးကြဲလေယာဉ် ခြောက်စင်းအထိ တပ်ချထားမယ့် အစီအစဉ်ဟာ ဒေသတွင်း လက်နက်အပြိုင်အဆိုင် ဖြစ်လာနိုင်တယ်လို့ တရုတ်က အောက်တိုဘာ ၃၁ ရက်မှာ ပြောပါတယ်။

ဗုံးကြဲလေယာဉ်တွေအတွက် သီးသန့်အဆောက်အအုံတွေကို ဩစတေြးလျနိုင်ငံ မြောက်ပိုင်း နယ်မြေ မြို့တော် ဒါဝင်မြို့ရဲ့ တောင်ဘက် မိုင် ၁၉၀ လောက်မှာရှိတဲ့ ဝေးလံသီခေါင်တဲ့ နေရာက တော်ဝင်သြစတြေးလျလေတပ်ရဲ့ အဝေးထိန်းတပ်စခန်းဖြစ်တဲ့ တင်ဒယ်လ်စခန်းမှာ ထားမယ်လို့ နီးစပ်သူတဦးက ပြောပါတယ်။

အောက်တိုဘာ ၃၁ ရက် ပုံမှန်သတင်းစာရှင်းလင်းပွဲမှာ မှတ်ချက်ပေးဖို့ တောင်းဆိုတဲ့အခါ တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ကျောက်လိကျန်းက နိုင်ငံတွေကြား ကာကွယ်ရေးနဲ့ လုံခြုံရေး ပူးပေါင်းဆောင်ရွက်မှုဟာ တတိယနိုင်ငံတွေကို ပစ်မှတ်မထားသင့်ဘူးလို့ ပြောပါတယ်။

စစ်အေးခေတ်ဟောင်းစိတ်ဓာတ်နဲ့ ကျဉ်းမြောင်းတဲ့ ပထဝီဝင်နိုင်ငံရေး အယူအဆတွေကို စွန့်လွှတ်ဖို့နဲ့ ဒေသတွင်း ငြိမ်းချမ်းရေးနဲ့ တည်ငြိမ်ရေးကို အထောက်အကူပြုဖို့၊ အပြန်အလှန် ယုံကြည်မှုမြှင့်တင်ဖို့ တရုတ်က သက်ဆိုင်ရာအဖွဲ့အစည်းတွေကို တိုက်တွန်းတယ်လို့လည်း ကျောက်လိကျန်းက ပြောပါတယ်။