မြောက်ကိုရီးယား ဒုံးကျည်ထပ်မံပစ်ခတ်မှုကြောင့် ဂျပန်က အရေးပေါ်သတိပေးချက် ထုတ်ပြန်

မြောက်ကိုရီးယားက နိုဝင်ဘာ ၃ ရက်မှာ ဒုံးကျည်တစင်း ထပ်မံပစ်လွှတ်ခဲ့ပြီး အဲဒီဒုံးကျည်ဟာ ဂျပန်နိုင်ငံကို ဖြတ်ကျော်ပျံသန်းမှာ စိုးရိမ်တဲ့အတွက် အရေးပေါ်သတိပေးချက် ထုတ်ပြန်ခဲ့ပါတယ်။
ဂျပန်နိုင်ငံမြောက်ပိုင်းက မိယာ့ငိ၊ ယာမာ့ငတ်တာ့နဲ့ နိအိငတ်တာ့ စီရင်စုတွေမှာ နေတဲ့သူတွေကို J-Alert အရေးပေါ်ထုတ်လွှင့်ချက် စနစ်အရ အိမ်ထဲမှာ ခိုလှုံနေဖို့ သတိပေးထားပါတယ်။
ဂျပန်ကာကွယ်ရေးဝန်ကြီး ယာစုခါ့ဇု ဟာမာဒါက နောက်ပိုင်းမှာ သတိပေးချက်ကို ပြန်တုံ့ပြန်ခဲ့ပြီး “ဒုံးကျည်ဟာ ဂျပန်ဘက်ကို ဖြတ်ကျော်ပျံသန်းတာ မရှိခဲ့ဘဲ ဂျပန်ပင်လယ်အထက် ကောင်းကင်ယံမှာ ပျောက်ကွယ်သွားခဲ့တယ်” လို့ သတင်းထောက်တွေကို ပြောပါတယ်။
မြောက်ကိုရီးယားက တရက်တည်းအတွင်း ဒုံးကျည် ၂၃ စင်းထက်မနည်း ပစ်ခတ်ပြီးတဲ့ နောက်ရက်မှာပဲ မြောက်ကိုရီးယားက နောက်ထပ် ဒုံးကျည် အကြိမ်ရေ အများအပြား ထပ်မံ ပစ်လွှတ်ခဲ့တာပါ။
ဒုံးကျည်တစင်းကတော့ တောင်ကိုရီးယား ကမ်းရိုးတန်းကို ပထမဆုံးအကြိမ်အဖြစ် ထိမှန်ခဲ့ပါတယ်။