အမေရိကန်သမ္မတဟောင်း ဒေါ်နယ်လ်ထရမ့်ပ်ဟာ ၂၀၂၄ ခုနှစ် သမ္မတရွေးကောက်ပွဲမှာ ဝင်ပြိုင်ဖို့ စီစဉ်တော့မှာဖြစ်ပြီး နိုဝင်ဘာ ၁၅ ရက်မှာ ကြေညာချက်ထုတ်ပြန်ဖို့ ရှိတယ်လို့ တနင်္လာနေ့က အိုဟိုင်းယိုးပြည်နယ်က ဒေးတန်မြို့မှာလုပ်တဲ့ နိုင်ငံရေးစုဝေးပွဲမှာ ပြောပါတယ်။

ထရမ့်ပ်က ကြားဖြတ်ရွေးကောက်ပွဲမတိုင်ခင် ရီပတ်ဘလစ်ကန် အမေရိကန် အထက်လွှတ်တော်ကိုယ်စားလှယ်လောင်း J.D. Vance အတွက် လူထုစည်းဝေးပွဲတခုမှာ သမ္မတ ဂျိုးဘိုင်ဒင်ကို ပြင်းပြင်းထန်ထန်ရှုတ်ချတဲ့ မိန့်ခွန်းပြောအပြီးမှာ သူဟာ အိမ်ဖြူတော်အတွက် ဒုတိယအကြိမ် အရွေးခံမှာဖြစ်ကြောင်းနဲ့ အမေရိကန်ပြည်ကြီးကတော့ ရူးသွပ်သွားပြီလို့ ထောက်ခံသူတွေကို ပြောကြားခဲ့တာပါ။ ဒါပေမဲ့ ထရမ့်ပ်ဟာ အသေးစိတ်ကို ပြောကြားဖို့တော့ ငြင်းဆန်ခဲ့ပါတယ်။

ထရမ့်ပ်ဘက်သား ထောက်ခံသူတွေဟာ ရွေးကောက်ပွဲဝန်ထမ်းတွေနဲ့ မဲဆန္ဒရှင်တွေကို ခြိမ်းခြောက် နှောင့်ယှက်နေကြောင်း ရိုက်တာသတင်းက ဖော်ပြပါတယ်။

အောက်လွှတ်တော်ဥက္ကဋ္ဌ နန်စီပေလိုစီရဲ့ ခင်ပွန်းဖြစ်သူ အောက်တိုဘာ ၁၈ ရက်က တိုက်ခိုက်ခံရမှုကြောင့် နိုင်ငံရေးအကြမ်းဖက်မှုကို ပိုမိုကြောက်ရွံ့လာစေပါတယ်။

တနင်္လာနေ့က အိုဟိုင်းယိုးပြည်နယ် လူထုစုဝေးပွဲမှာ ထရမ့်ပ်က အောက်လွှတ်တော်ဥက္ကဋ္ဌကို ‘တိရစ္ဆာန်’ လို့ ခေါ်ဆိုသုံးနှုန်းခဲ့ပါတယ်။ ဒါပေမဲ့ အိမ်ဖြူတော်ကတော့ တရားဥပဒေစိုးမိုးရေးပိုင်းဟာ တိကျပြီး ယုံကြည်ရလောက်တဲ့ ရွေးကောက်ပွဲဆိုင်ရာ ခြိမ်းခြောက်မှုတွေကို ဘာတခုမှ မထုတ်ပြန်ခဲ့ဘူးလို့ တနင်္လာနေ့မှာ ပြောခဲ့ပါတယ်။

အမေရိကန်တရားရေးဌာနကတော့ နိုင်ငံတဝန်းရှိ နေရာ ၆၄ ခုမှာ မဲပေးမှုတွေကို စောင့်ကြည့်သွားမယ်လို့ ပြောကြားခဲ့ပါတယ်။

တနင်္လာနေ့အစောပိုင်းက ဘိုင်ဒင်ဟာ ရီပတ်ဘလစ်ကန်တွေ နိုင်သွားရင် နိုင်ငံရဲ့ ဒီမိုကရေစီ အဖွဲ့အစည်းတွေကို အားနည်းသွားစေနိုင်ကြောင်း သတိပေး ပြောကြားခဲ့တာပါ။

နိုဝင်ဘာ ၈ ရက်မှာ အမေရိကန်တွေဟာ ကွန်ဂရက်လွှတ်တော်တရပ်ရပ် ဒါမှမဟုတ် လွှတ်တော် နှစ်ရပ်လုံးမှာ ရီပတ်ဘလစ်ကန်တွေ အနိုင်ရနိုင်ခြေရှိတဲ့ ရွေးကောက်ပွဲတွေမှာ မဲပေးကြတော့မှာဖြစ်တယ်လို့ ရိုက်တာသတင်းက ရေးပါတယ်။

ဘက်မလိုက်တဲ့ ရွေးကောက်ပွဲ ကြိုတင်ခန့်မှန်းသူတွေကတော့ အမတ်နေရာ ၄၃၅ နေရာရှိတဲ့ အောက်လွှတ်တော်မှာ ရီပတ်ဘလစ်ကန်တွေဟာ အကြမ်းဖျင်း နေရာ ၂၅ နေရာလောက် တက်လာနိုင်ဖွယ်ရှိပြီး အများစုအနိုင်ရဖို့ လုံလောက်တယ်လို့ ခန့်မှန်းကြပါတယ်။

ရီပတ်ဘလစ်ကန်တွေဟာ အထက်လွှတ်တော်ကို ချုပ်ကိုင်နိုင်ဖို့ လိုအပ်တဲ့ ၁ နေရာကို ရယူနိုင်ကြောင်း လေ့လာသုံးသပ်သူတွေက ပြောကြားခဲ့ပါတယ်။

တကယ်လို့ ထရမ့်ပ် အရွေးခံရပြီး အနိုင်ရခဲ့ရင် သမိုင်းမှာ ကာလတဆက်တည်း မဟုတ်တဲ့ ဒုတိယမြောက် အမေရိကန်သမ္မတ ဖြစ်လာမှာပါ။ အသက် ၇၉ နှစ်အရွယ် ဘိုင်ဒင်ကတော့ ဒုတိယမြောက်သက်တမ်းမှာ ပြန်အရွေးခံ မခံ မကြေညာထားသေးပါဘူး။