အင်္ဂလန်ကွင်းလယ်လူ ဘယ်လင်ဂမ်ရဲ့ အနာဂတ်နဲ့ပတ်သက်ပြီး ကမ္ဘာ့ဖလားပြိုင်ပွဲအပြီးမှာ ဆွေးနွေးဖို့ ဒေါ့မွန်အသင်း ဆုံးဖြတ်ထားပါတယ်။

အသက် ၁၉ နှစ်ပဲ ရှိသေးတဲ့ ကွင်းလယ်ကြယ်ပွင့် ဘယ်လင်ဂမ်ဟာ ဒေါ့မွန်မှာ ခြေစွမ်းပြနေပြီး အင်္ဂလန်လက်ရွေးစင်မှာလည်း ပုံမှန်ပွဲထွက်ခွင့် ရရှိနေသူပါ။

ဒေါ့မွန်အသင်းနဲ့ ၃ နှစ်စာချုပ်သက်တမ်း ကျန်ရှိနေသေးပေမယ့် ဘယ်လင်ဂမ်ရဲ့ တိုးတက်လာတဲ့ခြေစွမ်းကို လီဗာပူး၊ မန်စီးတီးအသင်းတွေက စိတ်ဝင်တစား စောင့်ကြည့်နေကြတာပါ။

ဒေါ့မွန်အသင်းစီအီးအို ဟန်စ်ဂျိုအာချင်ဝက်ဇ်ကီကတော့ ကမ္ဘာ့ဖလားအပြီးမှာ ကစားသမားဖြစ်သူရဲ့ ဆန္ဒကို မေးမြန်းပြီး အသင်းမှာ ဆက်နေချင်သည်ဖြစ်စေ၊ အသင်းပြောင်းရွှေ့လိုသည်ဖြစ်စေ နည်းလမ်းတကျ လုပ်ဆောင်သွားမှာ ဖြစ်တယ်လို့ ပြောပါတယ်။

ဘယ်လင်ဂမ်အတွက် ကြီးမားတဲ့ အပြောင်းအရွှေ့ကြေးနဲ့ ကမ်းလှမ်းလာမယ်ဆိုရင် ဒေါ့မွန်အသင်းဘက်က လက်ခံဖို့ရှိပါတယ်။

သူ့ကိုခေါ်ယူဖို့ လီဗာပူး၊ မန်စီးတီးအသင်းတွေအပြင် တခြားဥရောပထိပ်တန်းအသင်းတွေနဲ့လည်း သတင်းထွက်နေပါတယ်။