ထိုင်းနိုင်ငံအလယ်ပိုင်း၊ အယုဒ္ဓယမြို့ရှိ အယုဒ္ဓယဝိထယားလိုင်းကျောင်းမှာ  ဒီဇင်ဘာ ၁၃ ရက် မနက်က ဆင်တွေနဲ့ ကျောင်းသားလေးတွေ တဘက်စီ ဝင်ရောက်ယှဉ်ပြိုင်ကြတဲ့ ဆင်ကမ္ဘာ့ဖလားပြိုင်ပွဲ ကျင်းပခဲ့ပါတယ်။ 

လက်ရှိ ကာတာနိုင်ငံမှာ ကျင်းပနေတဲ့ ကမ္ဘာ့ဖလားဘောလုံးပွဲကို  အားပေးရင်း ဘောလုံးပွဲ လောင်းကစားမှုကို ဆန့်ကျင်ကြောင်းပြသတဲ့အနေနဲ့ ထိုင်းရိုးရာဆန်ဆန် ဆင်နဲ့ ကလေးတွေ ယှဉ်ပြိုင်ကစားခဲ့တာလို့ ဘောလုံးပွဲကျင်းပရေး ကော်မတီက သတင်းထောက်တွေကို ပြောပါတယ်။

ဘောလုံးပွဲမှာ ပါဝင်ကစားကြတဲ့ ဝမ်းချန့်ဆင်စခန်းက ဆင်ဦးစီးတွေနဲ့အတူ ဆင် ၁၁ ကောင်ဟာ နိုင်ငံတကာကိုယ်စားပြု အလံတွေ ပုံတွေကို သူတို့ရဲ့ ကိုယ်ပေါ်မှာ ဆေးခြယ်ထားကာ  အားကစားသမားတွေနဲ့အတူ တန်းစီ ချီတက်လာပြီး ဘောလုံးပွဲဒိုင်လူကြီးတွေကို အလေးပြုရာမှာ လွန်စွာ ချစ်စရာကောင်းလှတယ်လို့  khaosod ထိုင်းသတင်းမှာ ဖော်ပြပါတယ်။ 

ဘောလုံးကန်တဲ့အခါမှာလည်း အင်တိုက်အားတိုက်ကန်ခဲ့ကြကြောင်း၊ ပထမပွဲစဉ်မှာ ကျောင်းသားလေးတွေဘက်က ၁ ဂိုးသွင်းအနိုင်ရပြီး ပွဲပြီးခါနီးမှာ ဆင်လေးတွေဘက်က ၁ ဂိုး ပြန်လည်ချေပ သွင်းနိုင်ခဲ့လို့ သရေကျသွားပါတယ်။ 

တဘက်နဲ့တဘက် အနိုင် အရှုံး အဆုံးအဖြတ်ပေးဖို့ ပင်နယ်တီကို စောင့်ကြည့်ရမယ်လို့ ထိုင်း သတင်းမှာ ဖော်ပြသွားပါတယ်။ 

Photo-Khaosod