တနင်္သာရီတိုင်း၊ ပလမြို့ရဲစခန်းကို ဒီဇင်ဘာ ၂၁ ရက် နေ့လယ် ၁၂ နာရီခွဲလောက်က ပြည်သူ့ကာကွယ်ရေးတပ်ဖွဲ့ဝင်တွေ ဒုတိယကြိမ် ဝင်ရောက်တိုက်ခိုက်ခဲ့ပြီး နှစ်ဖက်ပစ်ခတ်မှု ဖြစ်ပွားခဲ့တယ်လို့ တိုက်ခိုက်မှုမှာ ပါဝင်သူတွေက ပြောပါတယ်။

အင်အား ၃၀ ကျော်လောက်ရှိတဲ့ စစ်ကောင်စီတပ်ဖွဲ့ဝင်တွေနဲ့ မိနစ် ၃၀ လောက် တိုက်ပွဲဖြစ်ပွားခဲ့ပြီး ပြည်သူ့ကာကွယ်ရေးတပ်ဘက်ကတော့ အထိအခိုက်မရှိခဲ့ဘူးလို့ ဆိုပါတယ်။

ပြည်သူ့ကာကွယ်ရေးတပ်မတော် မြိတ်ခရိုင် တပ်ရင်း ၁ ပြန်ကြားရေးတာဝန်ရှိသူတဦးက “စခန်းကို ဝင်တိုက်ဖို့က အစီအစဥ်မရှိဘူး၊ သူတို့ တိုရွာဘက်ကို လက်နက်ကြီးနဲ့ပစ်လို့ ကျနော်တို့ ဝင်တိုက်ဖြစ်သွားတာ၊ ရဲစခန်းအနားထိ ဝင်ပစ်တာ၊ သူတို့ဘက်က ၃ ဦးကျတယ်” လို့ ဒီဗွီဘီကို ပြောပါတယ်။

တိုက်ပွဲအတွင်း စစ်ကောင်စီတပ်ဖွဲ့ဝင် ၃ ဦး သေဆုံးတယ်လို့ ပြောဆိုချက်နဲ့ ပတ်သက်ပြီး ဒီဗွီဘီအနေနဲ့ သီးခြား အတည်မပြုနိုင်သေးပါဘူး။

ရဲစခန်းကို ဝင်မတိုက်ခင် အဲဒီနေ့ မနက် ၈ နာရီလောက်မှာတော့ ပလမြို့နဲ့ကပ်နေတဲ့ တိုကျေးရွာမှာ ထားဝယ်-ကော့သောင်း ကားလမ်းမကြီးတလျှောက် ခရီးသွားကားတွေကို စစ်ဆေးဖို့ ပြည်သူ့ကာကွယ်ရေးတပ်တွေ ရောက်ရှိနေတဲ့အချိန် ပလမြို့ရဲစခန်းကနေ လက်နက်ကြီးနဲ့ ပစ်ခတ်တာကြောင့် ရွာခံအမျိုးသား ၂ ဦး သေဆုံးခဲ့ပြီး တခြား ၂ ဦးလည်း ထိခိုက်ဒဏ်ရာရလို့ ဆေးရုံတက်ရောက် ကုသနေရပါတယ်။

တိုကျေးရွာကို ပလမြို့ရဲ့ အမှ​တ် ၁ နဲ့ အမှတ် ၂ ရပ်ကွက်တွေအဖြစ် ပြီးခဲ့တဲ့ ၂၀၁၆ ခုနှစ်က သတ်မှတ်ခဲ့တာဖြစ်ပြီး လက်ရှိမှာတော့ ရွာခံတချို့ တိမ်းရှောင်နေကြတာတွေလည်း ရှိတယ်လို့ သိရပါတယ်။

ပြီးခဲ့တဲ့ ဒီဇင်ဘာ ၉ ရက်နေ့ကလည်း ပလမြို့ ရဲစခန်းကို ပြည်သူ့ကာကွယ်ရေးတပ်ဖွဲ့ဝင်တွေ ဝင်ရောက်တိုက်ခိုက်ခဲ့ပြီး နှစ်ဖက်တိုက်ပွဲ ဖြစ်ပွားခဲ့ပါသေးတယ်။