ထိုင်းတောင်ပိုင်း ရနောင်းခရိုင်ထဲမှာ ၁ ရက်အတွင်း တရားမဝင် ဝင်ရောက်လာတဲ့ မြန်မာနိုင်ငံသား ၃၉ ဦး ဖမ်းဆီးရမိတယ်လို့ ထိုင်းတပ်မတော် အမှတ် ၂၅ က ထုတ်ပြန်ပါတယ်။ 

ရနောင်းခရိုင် ကရပူရီမြို့နယ်က တပ်ဖွဲ့ဝင်တွေဟာ ဒီဇင်ဘာ ၂၀ ရက် မနက်အစာပိုင်းက ဘန့်နမ့်ကျစ်အုပ်စု ဖစ်ကဆဲမ်လမ်းမကြီးပေါ်မှာ လုံခြုံရေးစောင့်ကြပ်စစ်ဆေးစဉ် တိုယိုတာ ဟိုင်းလပ်ကား ၁ စီးနဲ့ ဆိုင်ကယ် ၁ စီးတို့ ရှေ့ဆင့်နောက်ဆင့်မောင်းနှင်လာပြီး စစ်ဆေးရေးဂိတ်ကို ဖြတ်ပြေးသွားတယ်လို့ ဆိုပါတယ်။ 

တာဝန်ရှိသူတွေက အနောက်ကနေလိုက်သွားရာမှာ အဆိုပါဆိုင်ကယ်နဲ့ကားဟာ ဒူးရင်းခြံထဲ ကွေ့ဝင်သွားပြီး တနေရာမှာရပ်လိုက်ကြောင်း၊ တာဝန်ရှိသူတွေ မှီလာတဲ့အခါ ကားမောင်းသမားနဲ့ ဆိုင်ကယ်မောင်းသမား ဒူးရင်းပင်တွေကြားကနေ အမှောင်ထဲထွက်ပြေးလွတ်မြောက်သွားခဲ့တယ် လို့ ဆိုပါတယ်။

ကားပေါ်မှာတော့ တရားမဝင်မြန်မာနိုင်ငံသား ၁၁ ဦး (အမျိုးသမီး ၈ ဦး၊ အမျိုးသား ၃ ဦး) တို့ရှိနေကြောင်း၊ ထွက်ပြေးသွားသူတွေကတော့ ပွဲစားနဲ့ လမ်းပြဖြစ်ကာ ကားနဲ့ ဆိုင်ကယ်ထဲမှာ ထိုင်းမှတ်ပုံတင်တွေ ကျန်ခဲ့တယ်လို့ ဆိုပါတယ်။ 

အဲဒီနေ့  နေ့ခင်းပိုင်းမှာတော့ ကရပူရီကနေ ချွန်းဖွန်းကိုသွားမယ့် လိုင်းကား ၁ စီးပေါ်ကနေ သက်တမ်းလွန် နိုင်ငံကူးလက်မှတ်ကိုင်ဆောင်ထားတဲ့ မြန်မာနိုင်ငံသား ၃ ဦး (ကျား ၂ မ ၁) နဲ့ ကလေးတယောက် ဖမ်းမိခဲ့ပါတယ်။ အသက် ၆၆ နှစ်ရွယ် ထိုင်းယာဉ်မောင်းသမားကိုလည်း တရားမဝင်သူတွေတင်ဆောင်လာမှုနဲ့ ဖမ်းဆီးလိုက်တယ်လို့ ဆိုပါတယ်။ 

ည ၁၀ နာရီခွဲချိန်မှာတော့ သတင်းပေးချက်ရထားတဲ့ ရနောင်းမြို့ ဘန်းလင်းရပ်ကွက် စက်ရုံဟောင်းတခုရဲ့ အနောက်ဘက်က တန်းလျားတခုကို သွားရောက်စစ်ဆေးခဲ့ကြောင်း၊ အိမ်ခန်းတခုထဲမှာ တရားမဝင်မြန်မာ ၁၃ ဦးကို အထုပ်အပိုးတွေနဲ့အတူ ဖမ်းဆီးရမိခဲ့ပါတယ်။ 

အဆိုပါအိမ်ခန်းကို ငှားရမ်းထားတဲ့ အသက် ၇၂  နှစ်ရွယ် ထိုင်းအဘိုးအို ၁ ဦးကိုလည်း တရားမဝင်သူများအား ခိုလှုံနေထိုင်ခွင့်ပေးမှုနဲ့ အရေးယူဖို့ ဖမ်းထားတယ်လို့ ဆိုပါတယ်။ 

နောက်ထပ်တရားမဝင်သူတွေ ဝင်လာဖို့ရှိကြောင်း သတင်းရထားတာကြောင့် အဆိုပါတန်းလျားရှေ့မှာ စောင့်ဆိုင်းနေကြရာမှာ ဒီဇင်ဘာ ၂၁ မနက် ၂ နာရီလောက်မှာတော့ ဟိုင်းလပ်ကား ၁ စီး ထပ်ဝင်လာကြောင်း၊ ကားထဲမှာ တရားမဝင်မြန်မာအမျိုးသား ၆ ဦး၊ အမျိုးသမီး ၅ ဦး လိုက်ပါလာပြီး ယာဉ်မောင်းနဲ့အတူ အားလုံးကို ဥပဒေအရအရေးယူဖို့ ဖမ်းဆီးထားတယ်လို့ ဆိုပါတယ်။ 

ဒီတကြိမ်မှာ မြန်မာနိုင်ငံသား စုစုပေါင်း ၃၉ ဦးနဲ့ ထိုင်းနိုင်ငံသား ၃ ဦးတို့ ဖမ်းဆီးခံခဲ့ရပါတယ်။