ထိုင်းတောင်ပိုင်း ဖတ်ထလုန်းခရိုင်ထဲမှာ ဇန်နဝါရီ ၁၈ ရက် မနက်က တရားမဝင်မြန်မာလုပ်သားတွေ တင်ဆောင်လာတဲ့ကား တစီး တိမ်းမှောက်သွားပြီး တဦး ဒဏ်ရာရကာ ၂၉ ဦး ဖမ်းဆီးခံရတယ်လို့ မန်နေဂျာအွန်လိုင်း  ထိုင်းသတင်းမှာ ဖော်ပြပါတယ်။ 

မနေ့ မနက် ၆ နာရီခွဲလောက်က ဖတ်ထလုန်း - ဆုန်ခလာသွား ဖစ်ကဆိမ်လမ်းမကြီးပေါ်မှာ ကား တစီးတိမ်းမှောက်နေကြောင်း အကြောင်းကြား လာတဲ့အတွက် သွားရောက်စစ်ဆေးခဲ့တယ်လို့ ဖတ်ထလုန်းနယ်မြေရဲစခန်း က သတင်းထောက်ကို ပြောပါတယ်။ 

တာဝန်ရှိသူတွေ ရောက်သွားချိန် နောက်ခန်းမှာ တာလပတ်အနက်ရောင်နဲ့ အလုံပိတ်ထားတဲ့  အဖြူရောင်အီဇူးစူးဟိုင်းလပ်ကား တစီး တိမ်းမှောက်နေပြီး ကားတာယာလည်း ပေါက်နေကြောင်း ၊ ဒါပေမဲ့ ကားမောင်းသမားနဲ့ ကားပေါ်လိုက်လာသူတော့ တယောက်မှ မတွေ့ဘူးလို့ ဆိုပါတယ်။ 

မျက်မြင်သက်သေတွေက ကားပေါ်ကလူတွေဟာ အထုပ်တွေဆွဲပြီး အနီးကတောထဲ ထွက်ပြေးသွားကြတယ်လို့ ပြောတာကြောင့် တာဝန်ရှိသူတွေက လိုက်လံရှာဖွေကြကြောင်း ၊ အဲဒီနောက် အခင်းဖြစ်တဲ့နေရာနဲ့ ၁ ကီလိုအကွာ အိမ်ဟောင်း တလုံးမှာ လူ ၂၉ ယောက် (  ကျား ၁၉  ၊ မ ၈ နဲ့ ကလေး ၂ ယောက် ) ပုန်းခိုနေတာ တွေ့တယ်လို့ ဆိုပါတယ်။

စကားပြန်ကနေတဆင့် မေးမြန်းရာမှာ သူတို့ဟာ မြန်မာပြည်ဘက်ကနေ ထိုင်းနိုင်ငံထဲကို ရနောင်းမြို့ဘက်ကနေ ထိုင်းပွဲစားနဲ့ ဝင်ရောက်လာကြောင်း ၊ မလေးရှားနိုင်ငံကို ဆက်သွားဖို့ ဟတ်ယိုင်ဘက်အလာ အခုလို မတော်တဆဖြစ်မှုကြုံရတာလို့ ဆိုပါတယ်။ 

အဆိုပါ ၂၉ ဦးထဲမှာ တဦးက ဒဏ်ရာရထားတဲ့အတွက် ဖတ်ထလုန်းဆေးရုံကြီးကို ပို့ထားပြီး ကျန်သူတွေကိုတော့ လဝကဥပဒေနဲ့ အရေးယူဖို့ ရဲစခန်းကို ပို့ထားတယ်လို့ ဆိုပါတယ်။ 

ကားမောင်းသမားကတော့ ထွက်ပြေးလွတ်မြောက်နေဆဲဖြစ်ပြီး ဆက်လက်စုံစမ်းရှာဖွေနေ တယ်လို့ သတင်းမှာ ဖော်ပြပါတယ်။ 

ကိုးကား - mgronline.com