ဂျပန်နိုင်ငံမှာ ဆက်တိုက်ဖြစ်ပွားနေတဲ့ လုယက်မှုတွေမှာ ပါဝင်ပတ်သက်နေတယ်လို့ သံသယရှိတဲ့ ဂျပန်တရားခံပြေး ၄ ဦးထဲက ၂ ဦးကို ဖိလစ်ပိုင် လူဝင်မှုကြီးကြပ်ရေး အာဏာပိုင်တွေက ဖေဖော်ဝါရီ ၇ ရက်နေ့မှာ ပြည်နှင်ဒဏ်ပေးခဲ့ပါတယ်။

ကီယိုတို အီမာမူရနဲ့ တိုရှီယ ဖူဂျီတာ့ တို့ကို ဂျပန်လေကြောင်းလိုင်း လေယာဉ်ပေါ်မှာ တင်ဆောင်ထားပြီး ဂျပန်အာဏာပိုင်တွေဆီ လွှဲပြောင်းပေးအပ်မှာဖြစ်ကြောင်း ဖိလစ်ပိုင် တရားရေးဝန်ကြီး ဂျေဆပ်စ် ရီမူလာက  ဒီနေ့ ပြုလုပ်တဲ့ သတင်းစာရှင်းလင်းပွဲမှာ ပြောပါတယ်။

အီမာမူရနဲ့ ဖူဂျီတာ့ တို့ဟာ ဂျပန်နိုင်ငံရှိ သက်ကြီးရွယ်အိုတွေကို ပစ်မှတ်ထား လုပ်ဆောင်တဲ့ လုယက်မှုတွေနဲ့ ဆက်စပ်ပြီး ဂျပန်ရဲတပ်ဖွဲ့က အလိုရှိနေတဲ့ သံသယရှိ တရားခံ ၄ ဦးထဲက ၂ ဦး ဖြစ်ပါတယ်။

နောက်ထပ် သံသယရှိသူ  ၂ ဦးဖြစ်တဲ့ တိုမိုနိုဘူ ဆာအိတိုနဲ့ ယူကီ ဝါတာနာဘေး တို့ကိုလည်း အဲဒီအမှုနဲ့ မသက်ဆိုင်တဲ့ ဂျပန်နိုင်ငံက သူတို့ရဲ့ ဒေသဆိုင်ရာ ရာဇဝတ်မှု စွဲချက်တွေကို ရှင်းလင်းပြီးတာနဲ့ ပြည်နှင်ဒဏ်ပေးဦးမှာဖြစ်ကြောင်း လူဝင်မှုကြီးကြပ်ရေးဗျူရိုက ပြောပါတယ်။

ကွင်းဆက်အမှုတွေရဲ့ခေါင်းဆောင်လို့ ယူဆရတဲ့ ဝါတာနာဘေးဟာ “Luffy” ဆိုတဲ့ နာမည်တုကိုသုံးပြီး လှုပ်ရှားခဲ့တာပါ။ သူဟာ မနီလာ လူဝင်မှုကြီးကြပ်ရေးဌာနထဲမှာ ရှိနေချိန်အတွင်း ကုဒ်နံပါတ်ဖွက်ပြီး သုံးစွဲပေးပို့နိုင်တဲ့ မက်ဆေ့ချ်အက်ပ်ကနေတဆင့် လုယက်မှုတွေကို အမိန့်ပေးခဲ့တယ်လို့ စွပ်စွဲခံထားရပါတယ်။