အင်အားပြင်းမြေလျင်ကြောင့် သေဆုံးသူပေါင်း ၆၀၀၀ နီးပါးရှိလာပြီဖြစ်တဲ့ တူရကီနိုင်ငံအတွင်း ပြည်နယ် ၁၀ ခုမှာ အရေးပေါ်အခြေအနေကို တူရကီသမ္မတ တေယစ်အာဒိုက ဖေဖော်ဝါရီ ၇ ရက်မှာ က  ကြေညာခဲ့ပါတယ်။

ငလျင်ကြောင့် တူရကီတောင်ပိုင်းနဲ့ အိမ်နီးချင်း ဆီးရီးယားနိုင်ငံ အနှံ့အပြား ပျက်စီးခဲ့ပါတယ်။ တူရကီမှာ သေဆုံး ၅,၈၉၄ ဦး ဒဏ်ရာရသူ ၃၄,၀၀၀ ကျော်ရှိလာပြီလို့ ဆီးရီးယားမှာ လူပေါင်း ၁,၉၃၂ ဦးထက်မနည်း သေဆုံးပြီး ထောင်ပေါင်းများစွာ ဒဏ်ရာရခဲ့တယ်လို့ အာဏာပိုင်တွေနဲ့ ကယ်ဆယ်ရေးသမားတွေက အင်္ဂါနေ့မှာ ပြောပါတယ်။

ဆီးရီးယားနိုင်ငံ လခြမ်းနီအဖွဲ့ဟာ အတိုက်အခံတွေက ထိန်းချုပ်ထားတဲ့ ဒေသတွေ အပါအဝင် နိုင်ငံအတွင်းက ဒေသအားလုံးဆီ ကယ်ဆယ်ရေးအကူအညီတွေပေးဖို့ အဆင်သင့်ဖြစ်ပြီး ကူညီဆောင်ရွက်ပေးဖို့ ကုလသမဂ္ဂကို တိုက်တွန်းထားတယ်လို့ သူ့ရဲ့အကြီးအကဲ ခါလဒ် ဟူဘူဘောင်တီက အင်္ဂါနေ့ သတင်းစာရှင်းလင်းပွဲမှာ ပြောပါတယ်။

“ဒီဘေးအန္တရာယ်ကနေ ပြန်လည်ထူထောင်ရေးအတွက် နှစ်တွေမဟုတ်ရင် လပေါင်းများစွာ လိုမှာပါ” လို့ နိုင်ငံတကာကြက်ခြေနီနှင့် လခြမ်းနီအသင်းများ အဖွဲ့ချုပ်က အကြီးတန်းအရာရှိ ရှာဗီယာ ကတ်စတယ်လာနွိုက်စ် မော့စ်ကွေရာက ရိုက်တာသတင်းဌာနနဲ့ လူတွေ့မေးမြန်းချိန်မှာ ပြောပါတယ်။

ငလျင်လှုပ်ပြီး တရက်အကြာ ကြမ်းတမ်းတဲ့အခြေအနေမှာ အလုပ်လုပ်နေတဲ့ ကယ်ဆယ်ရေးသမားတွေဟာ ပြိုကျနေတဲ့ အဆောက်အအုံ အပျက်အစီးတွေထဲက လူတွေကို တူးဖော်ဖို့ ရုန်းကန်ခဲ့ရပါတယ်။ အလက်ပိုမြို့ဟောင်းမှာ ငလျင်လှုပ်ခတ်မှုကြောင့် ရှေးဟောင်းမြို့တော်လည်း ပျက်စီးခဲ့ပါတယ်။