ပီရူးအာဏာပိုင်တွေဟာ ဖေဖော်ဝါရီ ၂၁ ရက်က ဒီနှစ်မှာ နိုင်ငံရဲ့ ပမာဏအများဆုံး မူးယစ်ဆေးဝါး မီးရှို့ဖျက်ဆီးမှုအနေနဲ့ တရားမဝင်မူးယစ်ဆေးဝါး တန်ချိန်  ၁၄ တန်ကျော်ကို ဖျက်ဆီးခဲ့ပါတယ်။

သမ္မတ ဒီနာဘိုလူအာတာအစိုးရဟာ နိုင်ငံတွင်းမှာ မူးယစ်ဆေးဝါး ရောင်းဝယ်ဖောက်ကားမှု တိုက်ဖျက်ရေးကို အခိုင်အမာ လုပ်ဆောင်သွားမှာ ဖြစ်ကြောင်း ပြောပါတယ်။

အဲဒီမူးယစ်ဆေးဝါးတွေကို ၂၀၂၂ ခုနှစ် နိုဝင်ဘာလမှ အခုနှစ် ဖေဖော်ဝါရီလ ပထမပတ်အတွင်း မူးယစ်ဆေးဝါး တားဆီးနှိမ်နင်းရေး ညွှန်ကြားမှုဦးစီးဌာန၊ တိုင်းရဲတပ်ဖွဲ့နဲ့ တခြားအထူးတပ်ဖွဲ့တွေ ဆောင်ရွက်ခဲ့တဲ့ စစ်ဆင်ရေးပေါင်းများစွာအတွင်းမှာ သိမ်းဆည်းရမိခဲ့တာတွေဖြစ်ပြီး ကိုကင်းနဲ့ ဆေးခြောက်တို့ အပါအဝင် မူးယစ်ဆေးဝါး ၁၄ တန်ကျော်ဖြစ်ကြောင်း ပီရူးသမ္မတ ဒီနာ ဘိုလူအာတာက ပြောပါတယ်။

ပီရူးအစိုးရရဲ့ ဗီဒီယိုဖိုင်ထဲမှာ အရာရှိတွေဟာ အဖြူရောင်အမှုန့်တွေပါရှိတဲ့ အိတ်တွေကို မီးဖိုတွေအတွင်း စွန့်ပစ်နေကြတာပါ။

သမ္မတ ဘိုလူအာတာဟာ နိုင်ငံတွင်း မလုံခြုံမှုကို တိုက်ဖျက်မယ့် အစီအစဉ်ကို ရေးဆွဲဖို့အတွက် နိုင်ငံသားလုံခြုံရေးဆိုင်ရာ အမျိုးသားကောင်စီကို ခေါ်ယူသွားမယ်လို့လည်း ပြောခဲ့ပါတယ်။

နိုင်ငံတဝန်းလုံးက ဖြစ်တတ်တဲ့ ရာဇဝတ်မှုတွေကို အရေးတကြီးနဲ့ ခိုင်ခိုင်မာမာ ပြင်းပြင်းထန်ထန် အရေးယူဖို့ကို ပံ့ပိုးကူညီသွားမှာ ဖြစ်ကြောင်းလည်း ပြောပါတယ်။