ပရီးမီးယားလိဂ်ရဲ့ လုပ်ခအများဆုံး ပေးချရတဲ့ အသင်းစာရင်းမှာ မန်ယူအသင်းက ထိပ်ဆုံးကနေ ဦးဆောင်ခဲ့ပါတယ်။

The Times သတင်းစာရဲ့ ထုတ်ပြန်ချက်အရ ပြီးခဲ့တဲ့ ၂၀၂၁-၂၀၂၂ ဘောလုံးရာသီမှာ ကစားသမားတွေအတွက် လုပ်ခအများဆုံး ပေးချေခဲ့ရတဲ့အသင်းက မန်ယူအသင်းဖြစ်ပြီး စုစုပေါင်း ပေါင် ၃၈၄ သန်း ရှိခဲ့ပါတယ်။

ဒါဟာ ပေါင် ၂၆၄ သန်း ပေးချေခဲ့ရတဲ့ ၂၀၁၇ ခုနှစ်နောက်ပိုင်း ၄၅ ရာခိုင်နှုန်း တိုးမြင့်လာခဲ့တာပါ။ ဒုတိယနေရာမှာ လီဗာပူးအသင်းက မန်စီးတီးထက် ကျော်တက်ခဲ့ပြီး ပေါင် ၃၆၆ သန်းအထိ ပေးချေခဲ့ရပါတယ်။ ဒါဟာ ၂၀၁၇ ခုနှစ်ကထက် ၇၅ ရာခိုင်နှုန်းအထိ မြင့်တက်လာတာပါ။

တတိယနေရာမှာ မန်စီးတီးက ပေါင် ၃၅၄ သန်း၊ စတုတ္ထနေရာမှာ ချဲလ်ဆီးက ပေါင် ၃၃၃ သန်းနဲ့ ပဉ္စမနေရာမှာ စပါးအသင်းက ပေါင် ၂၀၉ သန်းနဲ့ ရပ်တည်ခဲ့ပါတယ်။

အခုနှစ်ရာသီမှာ အမှတ်ပေးဇယားကို ဦးဆောင်နေတဲ့ အာဆင်နယ်အသင်းကတော့ မနှစ်တုန်းက ပေါင် ၂၀၆ သန်း လုပ်ခပေးချေခဲ့ရပြီး ထိပ်တန်းအသင်းကြီး ၆ သင်းထဲမှာ အနည်းဆုံး လုပ်ခပေးချေရမှု ဖြစ်ပါတယ်။