ပြီးခဲ့တဲ့ ဖေဖော်ဝါရီလအတွင်း ကရင်နီပြည်နယ်ထဲမှာ တိုက်ပွဲအကြိမ်ရေ ၃၅ ကြိမ်ဖြစ်ပွားခဲ့ပြီး စစ်ကောင်စီတပ်သား ၄၅ ယောက်သေဆုံးကာ ၁၆ ယောက် ထိခိုက်ဒဏ်ရာရရှိခဲ့တယ်လို့ ကရင်နီ အမျိုးသား များကာကွယ်ရေးတပ် KNDF ဗဟိုသတင်းနှင့်ပြန်ကြားရေးဌာနက ထုတ်ပြန်ပါတယ်။

အဆိုပါတိုက်ပွဲတွေအတွင်း ကရင်နီပူးပေါင်းတပ်တွေက လက်နက် ၃၄ လက်၊ ခဲယမ်းတွေကို သိမ်းဆည်းရမိခဲ့ပြီး KNDF ဘက်ကတော့ ရဲဘော် ၂ ယောက် ကျဆုံးခဲ့ရကာ ကျဆုံးသွားတဲ့ ရဲဘော်တွေကို အမျိုးသားအာဇာနည်အဖြစ် သမိုင်းမှတ်တမ်းတင် အလေးပြုကြောင်းလည်း ဖော်ပြပါတယ်။

ဖေဖော်ဝါရီ ပထမပတ်အတွင်းက အကြမ်းဖက်စစ်ကောင်စီတပ်တွေဟာ ရှမ်း-ကယားနယ်စပ် မိုးဗြဲမြို့တွင်းရှိ ဘုရားစေတီ ကုန်းပေါ်နဲ့ မြို့ဘေးပတ်ဝန်းကျင်ရှိ  အနီးတဝိုက်ကျေးရွာတွေအတွင်း တပ်အင်အားဖြည့် တင်းလာတာကြောင့် ပြည်သူ့ကာကွယ်ရေးပူးပေါင်းတပ်ဖွဲ့တွေနဲ့ တိုက်ပွဲတွေ ဖြစ်ပွားခဲ့တာပါ။  

ဖေဖော်ဝါရီ ၂၄ ရက်မှာတော့ ပင်လောင်းမြို့နယ် ဆောင်းပြောင်းကျေးရွာအဝင်က စစ်ကောင်စီတပ် စစ်ဆေးရေးဂိတ်ကို ပြည်သူ့ကာကွယ်ရေးပူးပေါင်းတပ်ဖွဲ့တွေက တိုက်ခိုက်ခဲ့ရာ စစ်ကောင်စီတပ်က ဂိတ်စခန်း ကို စွန့်ခွာထွက်ပြေးခဲ့ကြတယ်လို့ KNDF က ပြောပါတယ်။ 

ဒါ့အပြင် ပင်လောင်းမြို့နယ် ဆောင်းပြောင်းကျေးရွာက တောင်မဲတင်းနဲ့ ပင်ပုံကျေးရွာဘက်ကို အကြမ်းဖက်စစ်ကောင်စီတပ် အင်အား ၁၀၀ ကျော်နဲ့ စစ် ကြောင်းထိုးခဲ့တာကြောင့် ကရင်နီပူးပေါင်းတပ်ဖွဲ့တွေနဲ့ တစ်ပတ်ကျော်ကြာ တိုက်ပွဲတွေ ဖြစ်ပွားခဲ့ပြီး မတ်လဆန်းအထိ တိုက်ပွဲတွေ ဖြစ်ပွားနေဆဲ ဖြစ်ပါတယ်။ တိုက်ပွဲတွေအတွင်း  စစ်ကောင်စီတပ်နဲ့ PNO/PNA ပူးပေါင်းတပ်တွေအထိနာတာကြောင့် လက်နက်ကြီး ပစ်ကူနဲ့ လေကြောင်းပစ်ကူတွေနဲ့ တိုက်ခိုက်ခဲ့ကြတယ်လို့ ဆိုပါတယ်။

ဒါ့အပြင် လွိုင်ကော်မြို့နယ်၊ လွိုင်ကော်-မိုးဗြဲ လမ်းမတလျှောက်က  စစ်ကောင်စီတပ်ရဲ့ လင်ဖုံလေးလမ်းခွဲနဲ့ ကယန်းသာယာလမ်းခွဲက စစ်ဆေးရေးဂိတ်တွေကို ပြည်သူ့ကာကွယ်ရေး ပူးပေါင်းတပ်ဖွဲ့တွေက ရှောင်တခင်တိုက်ခိုက်ခဲ့ကြသလို လက်နက်ကြီးတွေနဲ့ အရပ်သားပြည်သူတွေကိုတိုက်ခိုက်နေတဲ့  လွိုင်ကော်မြို့နဲ့ လွိုင်လင်လေးမြို့အခြေစိုက် တပ်ရင်းတွေကိုလည်း KNDF က တန်ပြန်တိုက်ခိုက်ခဲ့တယ်လို့ ဆိုပါတယ်။ 

ရှားတောမြို့နယ်မှာတော့ ကရင်နီတပ်မတော်(KA)နဲ့ KNDF တို့က စစ်ကောင်စီ  ရိက္ခာယာဥ်တန်းတွေကို ဖြတ်တောက် တိုက်ခိုက်တာတွေ၊ ရှေ့တန်းကုန်းစခန်းတွေကို တိုက်ခိုက် တာ၊ လှုပ်ရှားစစ်ကြောင်းတွေကို တိုက်ခိုက်ခဲ့ကြတယ်လို့ ထုတ်ပြန်ချက်မှာ ဖော်ပြပါတယ်။

ဖရူဆိုမြို့နယ်မှာတော့ အမှတ် (၁၄) စစ်လေ့ကျင့်ရေးကြောင်းက လှုပ်ရှားထွက်လာတဲ့ စစ်ကြောင်းတွေကို တိုက်ခိုက်တာတွေ၊ စစ်ကောင်စီတပ် ကင်းပုန်းစခန်းတွေကို ကရင်နီ တပ်မတော်(KA) နဲ့ KNDF တို့ကတိုက်ခိုက်ခဲ့တယ် ဆိုပါတယ်။

စစ်ကောင်စီတပ်ဟာ ဖေဖော်ဝါရီလအတွင်း ဒီးမော့ဆို၊ ဖရူဆို၊လွိုင်ကော်၊ဖယ်ခုံမြိုနယ်တွေမှာ အရပ်သားပြည်သူတွေကို ပစ်မှတ်ထားပြီးတော့ လက်နက်ကြီးတွေ ပစ်ခတ်တာ၊ စစ်ဘက်-အရပ်ဘက် မခွဲခြားဘဲ စစ်ရှောင်စခန်းတွေ၊ ကျေးရွာတွေ၊ ဘာသာရေး ဆိုင်ရာနေရာတွေကို လေကြောင်းနဲ့ စုစုပေါင်း ၆ ကြိမ်တိုက်ခိုက်ခဲ့ကြပြီး လက်နက်ကြီးနဲ့ တိုက်ခိုက်မှုကြောင့်  ကလေးသူငယ်တွေအပါအဝင် အရပ်သား ၈ ယောက် သေဆုံးခဲ့ရပြီး ၁၂ ယောက် ထိခိုက်ဒဏ်ရာရခဲ့တယ်လို့ ဆိုပါတယ်။ ဒါ့အပြင် လက်နက်ကြီးထိမှန်မှုကြောင့် လူနေအိမ် ၉ လုံး၊ ဆေးပေးခန်း ၁ ခန်း၊ ဘာသာရေးအဆောက်အဦး ၄ လုံး ပျက်စီးခဲ့ရတယ်လို့ KNDF ထုတ်ပြန်ချက်မှာ ဖော်ပြပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီးတိုင်းဒေသကြီးနဲ့ ပြည်နယ်တွေအနှံ့အပြား ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။