လတ်တလော ထိုင်းလူမှုကွန်ရက်မှာ ပုဂ္ဂလိကပိုင် တက္ကသိုလ်တခုရဲ့ လွတ်လပ်ပေါ့ပါးတဲ့ပုံစံနဲ့ ဘွဲ့ယူနေတဲ့ပုံတွေ ရေပန်းစားနေပါတယ်။ 

အဆိုပါတက္ကသိုလ်မှာ ဘန်ကောက်မှ PIM (Panyapiwat Institute of Management) အမည်ရှိ သက်မွေးဝမ်းကျောင်းဆိုင်ရာ တက္ကသိုလ်တခုဖြစ်ပြီး ပြီးခဲ့တဲ့ မတ် ၅ ရက်နေ့က ကျင်းပတဲ့ ဘွဲ့နှင်းသဘင်အခမ်းအနားမှာ ဘွဲ့ရမောင်မယ်တွေကို လွတ်လပ်ပေါ့ပါးတဲ့ပုံစံနဲ့ ဘွဲ့လက်မှတ် အပ်နှင်းနေတာပါ။

ထိုင်းနိုင်ငံမှာ ယခင်က ကျင်းပတဲ့ ဘွဲ့နှင်းသဘင်တွေမှာဆိုရင် ဝတ်စားဆင်ယင်မှု၊ သွားလာပုံ၊ ခြေလှမ်းလှမ်းပုံ၊ ဂါရဝပြုပုံ၊ ဘွဲ့လက်မှတ်ယူပုံတွေကို အားလုံးတပုံစံတည်းဖြစ်အောင် စည်းကမ်း တိကျစွာ လိုက်နာရပြီး ဘွဲ့ပေးတဲ့ပုဂ္ဂိုလ်တွေဟာလည်း အိန္ဒြေကြီးကြီး ရုပ်တည်တွေနဲ့ ထားရပါတယ်။ ဆံပင်ဆေးဆိုးတေ၊ လက်ဝတ်ရတနာဆင်ယင်တာ၊ လက်ကိုင်ဖုန်းကိုင်တာတွေ ခွင့်မပြုဘဲ ဓာတ်ပုံကိုလည်း မိမိဘာသာရိုက်ခွင့်မပြုပါဘူး။ 

PIM ရဲ့ ဘွဲ့နှင်းသဘင်မှာတော့ ဘွဲ့လက်မှတ်ပေးမယ့် ဆရာ/ဆရာမတွေဟာ မြူးကြွတဲ့ တေးသံနဲ့အတူ စင်ပေါ်ကို တက်ကြွစွာတက်လှမ်းလာပါတယ်။ ဘွဲ့ရမောင်မယ်တွေကလည်း မိမိနှစ်သက်တဲ့ အမူအရာပြကာ ဘွဲ့လက်မှတ်လက်ခံရယူပါတယ်။ ဘွဲ့လက်မှတ်ယူပြီးတာနဲ့ အချို့မှာ ဘွဲ့ပေးတဲ့ဆရာ/ဆရာမနဲ့ အသည်းပုံလက်ချင်းထိကာ ဆယ်လ်ဖီဆွဲတာ၊ အချို့က ဆရာနဲ့ လက်သီးချင်းထိတာ၊ လက်ဝါးချင်းရိုက်တာတွေ ပြုလုပ်ပြီး ပြုံးရွှင်စွာ ပြန်ဆင်းသွားကြပါတယ်။ 

ဘွဲ့ယူမောင်မယ်တွေဟာ မိမိနှစ်သက်သလို ဝတ်စားဆင်ယင်ခွင့်ရတာကြောင့် အချို့မှာ ရောင်စုံ လက်သည်းဆေးဆိုးတာ၊ ဆံပင်ဆေးဆိုးတာ၊ အလှမျက်မှန်တပ်ထားတာတွေလည်း တွေ့ရပါတယ်။ 

အခမ်းအနားအပြီးမှာလည်း  ကျောင်းအုပ်ကြီးက ဘွဲ့ရမောင်မယ်တွေအနေနဲ့ လိုရာဆန္ဒ ပြည့်ဝကြပါစေ၊ အနာရောဂါကင်းဝေးပါစေ၊ ကောင်းမွန်တဲ့လုပ်ငန်းကိုင်ငန်း တွေရကြပါစေ၊ ချစ်သူတွေလည်း ခိုင်မြဲရှည်ကြာချစ်နိုင်ကြပါစေ ဆိုတဲ့ ဆုတောင်းစကားကို သီချင်းသံစဉ်နဲ့ ဆုပေးသွားပါတယ်။ 

ဒီလိုတမူထူးခြားတဲ့ ဘွဲ့နှင်းသဘင်ပုံစံကို အချို့ကတော့ အရေးကြီးတဲ့ပွဲကို မထီမဲ့မြင်ပြုတယ်လို့ ပြစ်တင်ဝေဖန်နေပေမယ့် ဘွဲ့ယူမောင်မယ်၊ ဆရာဆရာမနဲ့ မိဘအုပ်ထိန်းသူတွေကတော့ ပြုံးပျော်ကျေနပ်နေကြပါတယ်။