အရှေ့ဥရောပရှိ နေတိုးအဖွဲ့ဝင်နိုင်ငံတွေအုပ်စုဖြစ်တဲ့ ဘူခါရက်စ် ၉ နိုင်ငံမှ နိုင်ငံခြားရေး ဝန်ကြီးတွေက ဧပြီလမှာ ကုလသမဂ္ဂလုံခြုံရေးကောင်စီရဲ့ အလှည့်ကျဥက္ကဋ္ဌ တာဝန်ယူရတဲ့ ရုရှားနိုင်ငံဆီကနေ ဘာကောင်းကျိုးမှ မျှော်လင့်လို့ရမှာမဟုတ်ဘူးလို့ မတ် ၃၁ ရက်မှာ ပြောကြားလိုက်ပါတယ်။ 

ဘူခါရက်စ်-နိုင်း ထိပ်သီးအစည်းအဝေးကို ပိုလန်နိုင်ငံ လို့ဒ်ဇ်မြို့မှာ ရိုမေးနီးယားနဲ့ ပိုလန်နိုင်ငံခြားရေးဝန်ကြီးတွေက ပူးတွဲကျင်းပခဲ့တာဖြစ်ပြီး ဒီအစည်းအဝေးကနေ လာမယ့် ဇူလိုင်လမှာ ကျင်းပမယ့် နေတိုးထိပ်သီးအစည်းအဝေး မတိုင်ခင် သူတို့ရဲ့ လုံခြုံရေးဆိုင်ရာ ရပ်တည်ချက်တွေကို ညှိနှိုင်းဆောင်ရွက်ဖို့ ရည်မှန်းထားပါတယ်။ 

ရုရှားဟာ ကုလသမဂ္ဂအဆင့်မှာ အားထုတ်လုပ်ဆောင်မှုတွေကို မထိခိုက်စေပဲ သူ့ရဲ့ ဒီဥက္ကဋ္ဌ ရာထူးတာဝန်ကို ထမ်းဆောင်နိုင်ဖို့ မျှော်လင့်ကြောင်း ရိုမေးနီးယားနိုင်ငံခြားရေးဝန်ကြီး ဘိုဒန် အော်ရီစကူက မီဒီယာတွေကို ပြောကြားခဲ့ပါတယ်။ 

ယေဘုယျအားဖြင့် နိုင်ငံတကာအသိုင်းအဝိုင်းတစ်ခုလုံးရဲ့ အဆင့်မှာ ယူကရိန်း ပဋိပက္ခကို ပြေလည်အောင်ဖြေရှင်းဖို့ ရှေ့ကို ဆက်သွားမလား ဆိုတာလည်း စောင့်ကြည့်ရမှာပါလို့ သူက ဆိုပါတယ်။ 

ပိုလန်နိုင်ငံခြားရေးဝန်ကြီး ဇီဘစ်နယို ရောင် ကတော့ ဒီဥက္ကဋ္ဌရာထူးကနေ အပြုသဘောဆောင်တဲ့ တစ်စုံတစ်ရာကို ကျနာ်တို့ မမျှော်လင့်ပါဘူးလို့ ပြောပါတယ်။ 

ရုရှားဟာ ဧပြီလမှာ လုံခြုံရေးကောင်စီရဲ့ အလှည့်ကျဥက္ကဋ္ဌရာထူးကို တာဝန်ယူချိန်မှာ ကုလသမဂ္ဂမှာ သူ့ရဲ့အခွင့်အရေး အားလုံးကို ကျင့်သုံးဖို့ စီစဉ်ထားကြောင်း ကရင်မလင်နန်းတော်က  ပြောကြားခဲ့ပါတယ်။ 

ရုရှားအနေနဲ့ ဒီတာဝန်ကို ယူတဲ့အခါမှာ ပညာရှင်ဆန်ဆန် ပြုမူဆောင်ရွက်ပေးဖို့ အမေရိကန် ပြည်ထောင်စုက မတ် ၃၀ ရက်မှာ တိုက်တွန်းခဲ့ပြီး ဒီရာထူးတာဝန်ကနေ မော်စကို ကို ပိတ်ဆို့ဖို့ နည်းလမ်းမရှိဘူးလို့လည်း ပြောပါတယ်။