ရိုမေးနီးယားနိုင်ငံ ကွန်စတန်တာမြို့ရှိ လေတပ်အခြေစိုက်စခန်းမှာ နေတိုးတပ်ဖွဲ့ရဲ့ စစ်ရေးလေ့ကျင့်မှု တစ်စိတ် တစ်ပိုင်းအဖြစ် အမေရိကန်နဲ့ ရိုမေးနီးယားတပ်ဖွဲ့တွေအကြား မတ်လ ၃၁ ရက်က လေကြောင်း တိုက်ခိုက်ရေး လေ့ကျင့်ခဲ့ကြပါတယ်။

အမှတ် (၁၀၁) အမေရိကန်လေကြောင်းတပ်ဖွဲ့တွေဟာ ပြီးခဲ့တဲ့ နှစ်၊ ဇွန်လကုန်ကတည်းက ရိုမေးနီးယားနိုင်ငံကို စတင်ရောက်ရှိလာတာပါ။

ဒါဟာ ဒေသတွင်းမှာ နေတိုးတပ်ဖွဲ့တွေ အားကောင်းလာစေဖို့အပြင် မဟာမိတ်တွေရဲ့ စိုးရိမ်သံသယ ပပျောက်လာစေဖို့နဲ့ ရုရှားဘက်က နောက်ထပ် ရန်လိုမှုတွေအပေါ် ဟန်တားနိုင်ဖို့ ရည်ရွယ်ထားတဲ့ စစ်ရေးမစ်ရှင်တစ်ခုဖြစ်တယ်လို့ ဥရောပတိုက်ရှိ အမေရိကန် စစ်တပ်ရဲ့ ဝက်ဘ်ဆိုဒ်မှာ ဖော်ပြထားပါတယ်။

ယူကရိန်းနယ်စပ်မှာ ရုရှားတပ်တွေ အခိုင်အမာတည်ဆောက်မှုနဲ့ အတူ ဖေဖော်ဝါရီလ ကျူးကျော်မှုအပေါ် တုံ့ပြန်တဲ့အနေနဲ့ အမေရိကန် အပါအဝင် နေတိုးအဖွဲ့ဝင် အနောက်နိုင်ငံတွေက ရုရှားနဲ့ ဘီလာရုစ်နိုင်ငံ နယ်စပ်အနီး ဥရောပတိုက်အရှေ့ဘက်ခြမ်းမှာ တပ်ဖွဲ့တွေကို ပိုမိုနေရာချလာခဲ့ပါတယ်။

မတ်လ ၃၀ ရက်က ပင်လက်နက်မှာ နေတိုးဦးဆောင်တဲ့ စစ်ရေးလေ့ကျင့်မှုအတွင်း ရိုမေးနီးယားရဲ့ လေကြောင်း၊ ရေကြောင်းနဲ့ မြေပြင်တပ်ဖွဲ့တွေပါ ပါဝင်ခဲ့ကြပြီး အမေရိကန်ကလည်း လေကြောင်းစောင့်ကြည့်ရေး အကူအညီ ပေးခဲ့ပါတယ်။

Sea Shield 2023 လို့ အမည်ပေးထားတဲ့ ဒီစစ်ရေး လေ့ကျင့်မှု တစ်စိတ်တစ်ပိုင်းကို ယူကရိန်းနိုင်ငံနဲ့ ၁၉ မိုင်သာကွာဝေးတဲ့ ဒန်းညုဘ် (Danube) မြစ်ဝကျွန်းပေါ် ဒေသက ကမ်းရိုးတန်းတစ်နေရာမှာ ရန်သူရဲ့ တိုက်ခိုက်မှုကို ပုံစံတူခင်းကျင်းပြီး လေ့ကျင့်ခဲ့ကြတာပါ။