ရုရှားနိုင်ငံ၊ စိန့်ပီတာစဘတ်မြို့က ဗုံးပေါက်ကွဲမှုကြောင့် နာမည်ကြီး ရုရှားစစ်ရေးဘလော့ဂါ ဗလာဒလန်တာတာစကီ သေဆုံးပြီး လူဒါဇင်ချီ ဒဏ်ရာရခဲ့တာအတွက် ယူကရိန်းအစိုးရကို အပြစ်တင်မှာ မဟုတ်ဘူးလို့ ရုရှားကြေးစားစစ်တပ်ဝဂ္ဂနာရဲ့ ခေါင်းဆောင် ယက်ဗ်ဂျေညီ ပရီဂေါ့ရှင်က ပြောပါတယ်။

ပေါက်ကွဲမှုနောက်ကွယ်မှာ အစွန်းရောက်အုပ်စုရှိတယ်လို့ သူထင်ကြောင်းလည်း ပရီဂေါ့ရှင်က ပြောပါတယ်။

ကော်ဖီဆိုင်ထဲမှာ လူတစုကို မိန့်ခွန်းပြောနေတုန်း တာတာစကီးကို လွှဲပေးခဲ့တဲ့ ရုပ်တုထဲမှာ ဗုံးကိုဝှက်ထားခဲ့တာလို့ အမည်မဖော်တဲ့ သတင်းရင်းမြစ်တခုကို ကိုးကားပြီး TASS သတင်းဌာနက ဖော်ပြခဲ့ပါတယ်။

ခမောက်ဝတ်ထားတဲ့ စစ်သည်တဦးရဲ့ ရုပ်တုကို လက်ထဲမှာ မိုက်ခရိုဖုန်းကိုင်ထားတဲ့ တာတာစကီးဆီ ပေးနေတာကို ပြထားတဲ့ ဗီဒီယိုတခုကို ရုရှားတရားဥပဒေစိုးမိုးရေး အဖွဲ့အစည်းတွေနဲ့ ချိတ်ဆက်ထားတဲ့ တယ်လီဂရန်ချန်နယ်တခုဖြစ်တဲ့ မတ်ရှ်က တင်ခဲ့ပါတယ်။ အဲလိုပေးပြီး မိနစ်ပိုင်းအကြာမှာ ပေါက်ကွဲခဲ့တာလို့လည်း ဆိုပါတယ်။

ပရီဂေါ့ရှင်က အဲဒီကော်ဖီဆိုင်ကို အရင်က သူပိုင်တယ်ဆိုပေမဲ့ အဲဒီနေရာမှာ အစည်းအဝေးတွေ ကျင်းပနေကြတဲ့ မျိုးချစ်တက်ကြွလှုပ်ရှားသူတွေကို ပေးခဲ့ပြီးပြီလို့ ပြောခဲ့ပါတယ်။