ရက်ရှ်ဖို့ဒ် ဒဏ်ရာရနေပေမဲ့  တိုက်စစ်မှူးမာစီယယ်နဲ့လည်း အသင်းရဲ့ အကောင်းဆုံးပုံစံရရှိအောင် ကစားနိုင်စွမ်းရှိကြောင်း မန်ယူနည်းပြတန်ဟတ်ဂ်ကပြောပါတယ်။ 

မာစီယယ်ဟာ ဒဏ်ရာပြဿနာတွေကြောင့် ပွဲကစားခွင့်နည်းပါးခဲ့ပေမဲ့ နောက်ဆုံးကစားခဲ့တဲ့ အဲဗာတန်နဲ့ပွဲစဉ်မှာ လူစားဝင်ကစားပြီးအနိုင်ဂိုးတစ်ဂိုးသွင်းခဲ့ပါတယ်။

တိုက်စစ်မှူး ရက်ရှ်ဖို့ဒ်က ကြွက်သားဒဏ်ရာကြောင့် ဆီဗီလာနဲ့ ကစားရမယ့် ယူရိုပါလိဂ်ပထမအကျော့ကို လွဲချော်မှာ ဖြစ်ပြီး မာစီယယ်က တိုက်စစ်မြားဦးမှာ ပွဲထွက်လာဖို့ရှိတာပါ။

နည်းပြတန်ဟတ်ဂ်ကတော့ မာစီယယ်ဟာ အသင်းအပေါ်မှာ အကျိုးပြုတဲ့ ကစားသမားဖြစ်ပြီး မန်စီးတီး၊ လီဗာပူးလို အသင်းတွေနဲ့ ပွဲစဉ်မှာ ခြေစွမ်းပြသနိုင်ခဲ့ကြောင်း၊ မာစီယယ်နဲ့လည်း ကောင်းဆုံးခြေစွမ်းရရှိအောင်ကစားနိုင်ကြောင်းပြောပါတယ်။

ပြင်သစ်တိုက်စစ်မှူးဟာ မနှစ်က အငှားထွက်ကစားခဲ့တဲ့ အသင်းဟောင်းဆီဗီလာနဲ့ ပြန်လည်ရင်ဆိုင်ရမှာပါ။ မာစီယယ်ဟာ ဆီဗီလာမှာကစားစဉ်က စုစုပေါင်း ၁၂ ပွဲမှာ တစ်ဂိုးသွင်းခဲ့ ပါတယ်။