အင်ဒိုနီးရှားနိုင်ငံ ဂျကာတာမြို့မှာ အားထူးရပ်စ် မျိုးကွဲဟာ နိုင်ငံကိုဝင်ရောက်လာတဲ့အတွက် ကိုဗစ်-၁၉ ဖြစ်ပွားမှု အရေအတွက် ဆက်လက်မြင့်တက်လာနိုင်တယ်လို့ ဂျကာတာ ကျန်းမာရေးအေဂျင်စီက သတိပေးခဲ့ပါတယ်။

အင်ဒိုနီးရှားနိုင်ငံ ဂျကာတာမြို့မှာ မတ် ၂၃ ရက်က အားထူးရပ်စ် မျိုးကွဲ အတည်ပြုလူနာ ၁၀ ဦး တွေ့ရှိခဲ့ပါတယ်။

အားထူးရပ်စ် ဒါမှမဟုတ် အက်စ် ဘီဘီ ၁.၁၆ ဟာ တိုကျိုတက္ကသိုလ်ရဲ့ လေ့လာမှုတခုအရ အက်သ် ဘီဘီ ၁ နဲ့ အက်စ်ဘီဘီ ၁.၁၅ ထက် ပိုမိုပြင်းထန်စွာ ပျံ့နှံ့နိုင်တဲ့ အိုမီခရွန် ဗိုင်းရပ်စ်တမျိုး ဖြစ်ပါတယ်။

ပြီးခဲ့တဲ့ရက်သတ္တပတ် အနည်းငယ်က အင်ဒိုနီးရှားမှာ နေ့စဉ်ကူးစက်မှုပေါင်း ၁,၀၀၀ ကျော်ကို စစ်ဆေးတွေ့ရှိခဲ့ပြီး ၂၀၂၀ ခုနှစ် မတ်လကနေ စုစုပေါင်း ကူးစက်မှု ၆ ဒသမ ၇ သန်း ရှိခဲ့ပါတယ်။

“ရောဂါကူးစက်မှုက မြင့်တက်နေတုန်းပဲ။ နောက်အပတ်မှာ အမြင့်ဆုံးကူးစက်မယ်လို့ ခန့်မှန်းထားပါတယ်” လို့ ဂျကာတာ ကျန်းမာရေးအေဂျင်စီက ကူးစက်ရောဂါနဲ့ ကာကွယ်ဆေးထိုးခြင်း စောင့်ကြည့်ရေးဌာနခွဲ အကြီးအကဲ နာဘီလာ ဆလာမာက မေ ၁ ရက်မှာ ကြေညာခဲ့ပါတယ်။

အစိုးရအချက်အလက်အရ တနိုင်ငံလုံးအတိုင်းအတာအရ လွန်ခဲ့တဲ့ တပတ်အတွင်း ကိုဗစ်-၁၉ ကူးစက်မှု စမ်းသပ်စစ်ဆေးသူ ၁၀,၀၀၀ ခန့်ရှိပြီး ၁၀ ရာခိုင်နှုန်းမှာ ဗိုင်းရပ်စ်ပိုး စစ်ဆေးတွေ့ရှိခဲ့ပါတယ်။

ဂျကာတာမှာ သေဆုံးခဲ့တဲ့လူနာ ၁၆ ယောက်မှာ စတုတ္ထမြောက် ကိုဗစ်ကာကွယ်ဆေး မထိုးထားကြောင်းနဲ့ ကာကွယ်ဆေးထိုးနှံဖို့ ဒေါက်တာ ဆလာမာက ဒေသခံတွေကို တိုက်တွန်းထားပါတယ်။