အမေရိကန်က ယူကရိန်းကို ဒေါ်လာ ၁ ဒသမ ၂ ဘီလီယံတန်ဖိုးရှိ စစ်ရေးအကူအညီ ပေးမည်
အမေရိကန်ပြည်ထောင်စုဟာ စုစုပေါင်း ပမာဏ ဒေါ်လာ ၁ ဒသမ ၂ ဘီလီယံတန်ဖိုးရှိ ကာကွယ်ရေးအစီအစဥ်အသစ်ကို ပံ့ပိုးပေးမှာဖြစ်ကြောင်း ယူကရိန်းသမ္မတ ဗိုလိုဒီမာ ဇလန်းစကီးက မေ ၉ ရက်မှာ ပြောကြားခဲ့ပါတယ်။
အမြောက်တွေ၊ အကြမ်းဖက်ကာကွယ်ရေး ဒုံးကျည်တွေနဲ့ ဒရုန်းတွေအပြင် ကာကွယ်ရေးကို အားကောင်းစေမယ့် တခြားပစ္စည်းတွေဖြစ်ကြောင်း ဇလန်းစကီးက သူ့ရဲ့ ညစဉ်မိန့်ခွန်းမှာ ပြောကြားခဲ့ပါတယ်။
အမေရိကန်ဘက်ကလည်း ယူကရိန်းအတွက် ဒေါ်လာ ၁ ဒသမ ၂ ဘီလျံတန် စစ်ဘက်ဆိုင်ရာ အကူအညီပေးရေး အစီအစဉ်သစ်မှာ လေကြောင်းရန်ကာကွယ်ရေးစနစ်တွေ၊ ခဲယမ်းမီးကျောက်တွေနဲ့ လေ့ကျင့်ရေးရန်ပုံငွေတွေ ပါဝင်မှာဖြစ်ကြောင်း အင်္ဂါနေ့ အစောပိုင်းမှာ ကြေညာခဲ့ပါတယ်။
ယူကရိန်းလုံခြုံရေး အထောက်အကူပြုမှု (USAI) က ရန်ပုံငွေတွေကို လက်နက်တွေ ဝယ်ယူရာမှာ အသုံးပြုမှာဖြစ်ပြီး သမ္မတ ဂျိုးဘိုင်ဒင်ရဲ့ အစိုးရအဖွဲ့ကိုလည်း အမေရိကန် လက်နက်သိုလှောင်မှုတွေကနေ ဆွဲထုတ်ယူသုံးမယ့်အစား လက်နက်စက်ရုံတွေကနေ ဝယ်ယူခွင့်ပေးသွားမှာ ဖြစ်ပါတယ်။
ဒီရန်ပုံငွေတွေဟာ ၁၅၅ မမ ဟောင်ဝစ်ဇာကျည်တွေ၊ တန်ပြန်ဒရုန်းကျည်ဆန်တွေ၊ ဂြိုဟ်တုဓာတ်ပုံတွေနဲ့ လေ့ကျင့်မှုအမျိုးအစား အမျိုးမျိုးအတွက် ပေးသွားမှာဖြစ်ကြောင်း ပင်တဂွန်စစ်ဌာနချုပ်က ပြောပါတယ်။
၂၀၂၃ ဘဏ္ဍာနှစ်အထိ ကာကွယ်ရေးဝန်ကြီးဌာနဟာ သီးခြားကဏ္ဍ ၄ ခု ခေါင်းစဉ်နဲ့ USAI လက်အောက်မှာ ယူကရိန်းကို လုံခြုံရေးအကူအညီ ဒေါ်လာ ၅ ဘီလီယံ ထောက်ပံ့ပေးထားပါတယ်။
၂၀၂၂ ဘဏ္ဍာနှစ်မှာ အမေရိကန်ဟာ ယူကရိန်းကာကွယ်ရေးအတွက် ဝယ်ယူလုပ်ကိုင်မယ့် USAI ရန်ပုံငွေဒေါ်လာ ၆ ဒသမ ၃ ဘီလီယံတန်ဖိုး ထားရှိပေးခဲ့ပါတယ်။
