Milli Şuranın sədri Cəmil Həsənli
Elə bilirdiniz ölkənin təhlükəsizlik sistemini çökürtmüş Eldar Mahmudovun gedişi və adı korrupsiya qalmaqalında hallanan Əli Nağıyev gəlişiylə, Prokurorluğun bətnində qarayaraya çevrilmiş Qaralovun gedişi və korrupsiya müşahidəçisi Kamran Əliyevin gəlişi ilə vəziyyət dəyişəçək, reforma olacaq? Zakir Qaralov necə Xalq Cəbhəsi sədrinin köməkçisi Faiq Əmirlini Gülən imam xətibi etmişdi, ictiami əsaslarla sürücüsü Paşa Umudovu “narkobaron” etmişdi, Kamran Əliyev də eyni dəsti-xətlə Əli Kərimlinin mühafizəçisi Niyaməddin Əhmədovu cəfəngdən – cəfəng “terrorçuluğun maliyyələşdirilməsində” ittiham edir. Eldər Mahmudovun dövründə MTN necə işgəncə labaratoriyasına çevrilmişdi, Əli Nağıyev də DTX-nı qaytardı əvvəlki məcrasına. Nə dəyişib?
İndi mən sizlərə deyim ki, Paşa Umudov necə “narkobaron” olub, Niyaməddin necə terrorculuğun “xəzinədarına” çevrilib. Deməli, Əli Kərimli bəyin son bir neçə ildir maşını yoxdur. Milli Şuranın Koordinasiya Mərkəzinin toplantısı olan günlər mən öz maşınımla Əli bəygilə gedir, orada Əli bəylə birlikdə Paşa Umudov sürücü kimi, Niyaməddin bəy də qoruyucu kimi bizə qoşulur, toplantıya gedirdik. Toplantıdan axşam geri dönəndə, əvvəl Əli bəyi evində qoyur, Paaşa bəylə Niyaməddin bəy məni evə gətirdilər.
Amma nə qədər çətin olsa da deməliyəm ki, bu “narkobaronla”, terror “xəzinədarının bəzən ictimai nəqliyyatla evlərinə qayıtmağa yol pulu belə olmurdu. Niyaməddin son dərəcə kübar və tərbiyəli oğlan olduğu üçün bunu hiss etdirmirdi. Mən ondan xəbərsiz “narkobaronun” cibinə 5-10 manat pul qoyurdum kimi gedib evlərinə çıxa bilsinlər. Bəzən də Paşa “narkobaron” mənə deməklə maşının sürücü tərəf qapısının tutacaq yerinə parking üçün qoyduğum dəmir pulları götürürdü ki, metro və avtobusla evinə gedib çıxa bilsin. Bir müddət əvvəl gördüm ki, Paşa bəy ekran qarşısında oturub heroin satmasından danışır.
Biz orta məktəbdə oxuyanda “Kommunist” və digər qəzetlərdə Nikata Xruşşovun böyük şəklini görəndə onu qaralamağı, Nikitaya buğ qoymağı xoşlayırdıq. Sovet hökumətinin hər üzün görmüş yaşlı əmim bunu görəndə xəbərdarlıq edirdi dinc oturun və əlavə edirdi ki, Sovet hökuməti erkək eşşəyin altından bala çıxarır. İndi erkək eşşəyin altından bala çıxaran Sovet hökuməti İlham Əliyevin “müstəqil” istibdadının yanında toya getməli olub.
Dünən dəhşətli xəbər aldım. DTX-da Niyaməddin bəyə insan ağlına sığmayan işgəncə verirlər. Böyrəklərindən qan sızır, cinsiyyət orqanına müdaxilə edilib (çox ehtimal ki, elektrik cərəyanı veriblər. “Bandotdeldə” bunu Nardaran məhbuslarına da etmişdilər). İnsanlıq adına həqarətdir. Bu ancaq nasist canilərinin, Sovet Lyubyankasının yaddaşları donduran əməlləri ilə müqayisə edilə bilər. Yəqin ki, Niyaməddin bəy o terror “xəzinəsinə” sahib durana qədər bu müsibət davam edəcək. Və sonra Paşa Umudov “narkobaron” olduğun “etiraf” etdiyi kimi, Niyaməddin bəyə də terror “xəzinədarı” olduğunu “etiraf etdirməyə” cəhd göstərəcəklər.
Niyaməddin tanıdığım ən tərbiyəli gənclərdən biridir. Yoxsul bir həyat yaşasa da heç vaxt bunu hiss etdirmirdi. Ucuz bir evdə kirayədə qaırdı. Namuslu, qürurlu, doğru-dürüst, vətənsevər bir gəncdir. Onun böyrəklərindən qan sızdıran Əli Nağıyevin oğlanları korrupsiya pulların Avropada yerbəyer edəndə Niyaməddin Əhmədov ciynində qrantamyot vətəni müdafiə edirdi, torpağı qoruyurdu.
Bütün bu oyunlar Əli Kərimliyə görədir. Hakimiyyət yalnız onu ev dustağına çevirməyib, yalnız kommunikasiya əlaqələrin kəsməyib, həm də yaxınların həbs etməklə mühasirəni daraldır. “Xəzinədən” bir şey çıxsa yəqin ki, onu Əli Kərimliyə “xərcləməyə” çalışacaqlar. Tofiq Yaqublu da, Paşa da, Niaməddin və digər cəbhəçilər də Əliyevin Qərblə növbəti alver predmetidir. Bunlar öz vətəndaşların tutub, onlara olmazın əzablar verib, onlardan Qərblə alver etmək məqsədiylər istifadə edirlər. Bu həbslər, işgəncələr, insan əzabları bir həddə çatıqdan sonra bunların Qərbdəki lobbiləri Qərb ofislərinə ideylar verəcəklər ki, oturub bu məsələləri Əliyevlə müzakirə etmək lazımdır. Məhv edilən insan taleləri, elektrik cərəyanı verilən insan bədənləri, insanın qan sızan cinsiyyət orqanları üzərindən bunlar siyasət alveri edirlər. O vaxt Əliyev Xədicə xanımın hesabına vitse-prezident Joe Bidenin əlini sıxa bildi, indi də prezident kimi onun əlini sıxmağın tədarükünü görür. Onun öz xalqının qanına batmış əlini sıxmağın yolu Əli Kərimlinin həbsindən keçir. Nə qədər ki, Qərbdə əliyevlərin qanlı əlini sıxan tapılacaq, bu qan-qada hələ çox qurbanlar tələb edəcək. Budur Əliye rejimin gercək mahiyyəti, budur kleptokratik guruhun hakimiyyət hərisliyi, budur Qərbə can atan Şərq müstəbidliyinin astar tərəfi.