AXCP RH üzvü
Bu gün milli qürurumuzun yurdumuz Şuşada teatrallaşdırılaraq zorlanacağı gündür.
Biz də milli heysiyyətimizə, şərəfimizə edilən, bu təcavüzü seyr edə- edə, “bircə işlərin tez görüb bitirsəydilər və biz içimizdəki xəcalət acısını tezcə unutsaydıq” deyəcəyik.
Birazdan İşğalçı rejimin başçısı Şuşada prezident kimi and içib, vəzifəsinə başlayacaq. Paşiniyan da bu münasibətlə onun əlini sıxacaq.
Üzlərində də qorxu əvəzinə, qalib ədası, aşağılayıcı təbəssüm olacaq. Kimdən qorxsacaqlar ki? Arxalarında Rusiya, İran kimi dayaqları, önlərində isə Xudafərindən onlara körpü açan Azərbaycan iqtidarı kimi humanist, qayğıkeş “düşmənləri” var.
Təkcə utanc verici deyil, bu mənzərə, həm də milli varlığımıza, vətən bütövlüyümüzə, dövlətçiliyimizə xəyanətdir.
Daxildə müxalifətə qarşı amansız olanlar, ən amansız qəddarlığa əl atanlar, ermənilər qarşısında lal, üzüyola, mağmuna dönürlər. Cəsarətləri və vətən sevgisi çatmır ki, “Paşiniyan Şuşaya gəlsə, orada andiçmə olsa başınıza od ələyəcəyik” desinlər, düşmənə sərt üz göstərsinlər. Heç olmasa sözdə olmaz deyə biləydilər kaş ki.
Əksinə, dünyaya göstərmək istəyirlər ki, baxın bu ölkədə xalqın haqqlarını əlindən alsaq da, demokratik azadlıqlarını boğsaq da, işgəncəni, şərləməni dövlət siyasətinə çevirsək də, ermənilərə qarşı çox tolerantıq, mili maraqları qurban vermək hesabına, onlara hər cür güzəştə getməyə hazırıq. Bizdən başqa işğalçıya yol, körpü açan prinsipsiz, təslimçi, qorxaq hakimiyyəti hardan tapa bilərsiniz ki? Hardan tapa bilərsiniz bir də müharibə vəziyyətində olan ölkənin müdafiə büdcəsindən oğurlayıb, “otkat” alan, müdafiə qabiliyyətin sarsıdan bir hakimiyyəti?
Erməni lobbisi də belə bir hakimiyyəti, Ermənistanın yavər şansı bilib dünyada altdan- altdan niyə müdafiə etməsin ki?
İşğalçıya səsini çıxara bilməyib, Şuşadakı inaqurasiya maskaradına olmaz deyə bilməyən hakimiyyətin, bu ərəfədə hərbi təlim keçirməsi düşmənə hədə-qorxu gəlmək yox, onun qarşısında oriyental oynayıb əyləndirməyə daha çox bənzəyir.
Ona görə də düşmən qarşısında məğlub durumda olduğumiz kimi, tariximiz qarşısında üzü qara, dünya qarşısı başı aşağıyıq.