ချဲလ်ဆီးအသင်းဟာ တိုက်စစ်မှူး လူကာကူကို ပြန်လည်ခေါ်ယူဖို့အတွက် ပေါင် ၈၈ သန်းအပြင် နောက်ခံလူ အလွန်ဆို ကိုပါ အလိုက်ပေးကမ်းလှမ်းခဲ့ပေမဲ့ ပယ်ချခံခဲ့ရတယ်လို့ သိရပါတယ်။

ချဲလ်ဆီးနည်းပြ တူချယ်ဟာ ချန်ပီယံလိဂ်ဆုဖလားရယူနိုင်ခဲ့ပေမဲ့ ပုံမှန်ဂိုးသွင်းနိုင်တဲ့ အထောင်တိုက်စစ်မှူး တစ်ဦးခေါ်ယူလိုနေပြီး အသင်းတိုက်စစ်မှူးဟောင်း လူကာကူကို ပြန်လည်ခေါ်ယူဖို့ကြိုးပမ်းခဲ့တာပါ။

ချဲလ်ဆီးအသင်းဟာ ၂၀၁၄ ခုနှစ်က လူကာကူကို အဲဗာတန် အသင်းဆီ ရောင်းချခဲ့ပြီး အဲဒီနောက် မန်ယူ နဲ့ အင်တာမီလန်အသင်းတွေကို ဆက်ပြီးပြောင်းရွှေ့ခဲ့တာ ဖြစ်ပါတယ်။

ဘယ်လ်ဂျီယံတိုက်စစ်မှူး လူကာကူဟာ ၂၀၁၉ ခုနှစ်က မန်ယူနိုက်တက်ကနေ ပေါင် ၇၃ သန်းနဲ့ ပြောင်းရွှေ့လာပြီးနောက် အင်တာမီလန်အတွက် စုစုပေါင်း ၉၅ ပွဲမှာ ၆၄ ဂိုး သွင်းယူနိုင်ခဲ့ပါတယ်။

ချဲလ်ဆီးအသင်းဟာ တိုက်စစ်မှူး ဂျရူးကို အေစီမီလန်ဆီ ရောင်းချခဲ့တာကြောင့် လူကာကူ အပြင် ဒေါ့မွန်တိုက်စစ်မှူး ဟာလန်းကို ခေါ်ယူဖို့လည်း ဆန္ဒရှိနေပါတယ်။